ყვითელი სამარშრუტო ტაქსები თბილისში

კომპანია „თბილისის მიკროავტობუსი“ სპეციალურ განცხადებას ავრცელებს

335
(განახლებულია 13:51 06.02.2021)
დადგენილი რეგულაციების მიხედვით, ტრანსპორტში სავალდებულო იქნება პირბადის ტარება, ასევე მუნიციპალური ტრანსპორტი ღია ფანჯრებით გადაადგილდება და აიკრძალება გაგრილების სისტემის ჩართვა

თბილისი, 6 თებერვალი - Sputnik. თბილისში 8 თებერვლიდან მგზავრების მგზავრთა მომსახურეობა საკოორდინაციო საბჭოს მიერ დადგენილი შეზღუდვების გათვალისწინებით მოხდება, საგანგებო განცხადებას კომპანია „თბილისის მიკროავტობუსი“ ავრცელებს.

საკოორდინაციო საბჭოს გადაწყვეტილებით, 8 თებერვლიდან საზოგადოებრივი ტრანსპორტი მთელი ქვეყნის მასშტაბით განაახლებს მუშაობას.

გავრცელებული ინფორმაციით, კომპანიამ 1.300 მიკროავტობუსს სადეზინფექციო სამუშაოები ჩაუტარა. სატრანსპორტო საშუალებების დეზინფექცია ყოველი სამუშაო დღის შემდეგ მოხდება.

ასევე, ყოველდღიურად მოხდება მძღოლების თერმოსკრინინგი, ტემპერატურის აღმოჩენის შემთხვევაში კი მათ სწრაფი ტესტი გაუკეთდებათ.

უსაფრთხოების მიზნით მიკროავტობუსებში, როგორც მუნიციპალურ ავტობუსებში, აიკრძალა გაგრილების სისტემის ჩართვა და საზოგადოებრივი ტრანსპორტის გადაადგილება სავალდებულოა ღია ფანჯრებით.

მთავრობის მიერ დადგენილი რეგულაციების მიხედვით, ტრანსპორტში სავალდებულო იქნება პირბადის ტარება. პირბადის გარეშე მგზავრი არ დაიშვება ტრანსპორტში, გაკონტროლდება მეტროს შესასვლელებიც. ავტობუსის შემთხვევაში არ დაიძვრება ავტობუსი, თუ მოქალაქე პირბადის გარეშე ავა, ან თუ ვინმე ტრანსპორტში მოიხსნის პირბადეს.

„კომპანია თბილისის მიკროავტობუსი უმორჩილესად სთხოვს ყველა მომხმარებელს, კომპანიის სატრანსპორტო საშუალებით გადაადგილებისას აუცილებლად გამოიყენოს პირბადე და დაიცვას ზემოთ ჩამოთვლილი უსაფრთხო გადაადგილებისთვის აუცილებელი წესები, წინააღმდეგ შემთხვევაში კომპანია მძღოლს უტოვებს უფლებას არ დაძრას მიკროავტობუსი და სთხოვოს მგზავრს, რომელიც არ გამოიყენებს პირბადეს, დატოვოს სატრანსპორტო საშუალება“, - ნათქვამია კომპანიის განცხადებაში.

ქვეყნის მასშტაბით მუნიციპალური ტრანსპორტი შაბათ-კვირას არ იმოძრავებს.

ჯანდაცვის სამინისტროს ცნობით, ტრანსპორტში რეკომენდაციების დაცვა, შრომის ინსპექციასთან ერთად, მუნიციპალური საზედამხედველო სამსახურებისა და საპატრულო პოლიციის აქტიური ჩართულობით მოხდება.

საქართველოში ბოლო შვიდ დღეში კორონავირუსით ინფიცირების ე.წ. დადებითობის მაჩვენებელი 4%-ზე ქვემოთ ჩამოვიდა. შესაბამისად, მთავრობამ დაწესებული კოვიდ–შეზღუდვების ეტაპობრივი მოხსნის გადაწყვეტილება დაგეგმილზე ადრე მიიღო. კერძოდ, 8 თებერვლიდან საქართველოს მასშტაბით მუშაობას განაახლებენ მუნიციპალური ტრანსპორტი, ღია და დახურული ტიპის ბაზრობები, 15 თებერვლიდან კი – კაფე–რესტორნები.

1,5 საათის განმავლობაში ერთი გადახდით მგზავრობა მიკროავტობუსებითაც იქნება შესაძლებელი >>

დღეისათვის თბილისელებსა და დედაქალაქის სტუმრებს დაახლოებით 1,8 ათასი მიკროავტობუსი ემსახურება. დღის განმავლობაში სამარშრუტო ტაქსებით 600 ათასზე მეტი ადამიანი სარგებლობს.

335
მტკვარი

კრწანისის ტყე-პარკში სარწყავი წყლის სატუმბი სადგური შენდება

12
(განახლებულია 16:35 28.02.2021)
გარემოს დაცვისა და სოფლის მეურნეობის სამინისტროს ველური ბუნების სააგენტო კრწანისის ტყე-პარკის განახლებასა და აღდგენაზე მუშაობს.

თბილისი, 28 თებერვალი – Sputnik. ველური ბუნების სააგენტოს ორგანიზებით, კრწანისის ტყე-პარკში, მდინარე მტკვარზე მძლავრი სატუმბი სადგურის მშენებლობა მიმდინარეობს, რომელიც მტკვრის წყალს 8 ტბასა და ჭალის ტყის კორომების სარწყავ არხებს მიაწვდის, ნათქვამია უწყების მიერ გავრცელებულ ინფორმაციაში.

სამუშაოები დაფინანსებულია გლობალური გარემოსდაცვითი ფონდისა (GEF) და გაეროს განვითარების პროგრამის (UNDP) პროექტის „მტკვარი 2" მიერ.

აღსანიშნავია, რომ კრწანისის ტყე-პარკის განახლებისა და აღდგენის მიზნით მიმდინარე სამუშაოების ფარგლებში,  მოეწყო 100 კვტ სიმძლავრის მზის ელექტროსადგური; ხეების უკანონო ჭრის აღკვეთის და ბრაკონიერებისაგან დაცვის მიზნით ტყე-პარკის ტერიტორიის 150 ჰა შემოიღობა. დაგეგმილია მტკვრის სახეობათა თევზსაშენის მშენებლობა, დამშრალი 7 ტბორის აღდგენა და დათევზიანება, 50-მდე საპიკნიკე ლოკაციის მოწყობა.

ველური ბუნების სააგენტოს მიერ მასშტაბური სამუშაოების განხორციელების შემდეგ პარკი თავის უმნიშვნელოვანეს ფუნქციას დაიბრუნებს.

„ტყე-პარკი რეკრეაციული სივრცეა თბილისსა და რუსთავს შორის. პარკში გადაადგილება შესაძლებელი იქნება მხოლოდ ფეხით, ველოსიპედით ან მინი ელექტროავტომობილით“, -აღნიშნულია სააგენტოს ინფორმაციაში.

კრწანისის ტყე-პარკი XX საუკუნის 60-იან წლებში შეიქმნა და  მისი შექმნის მთავარი მიზანი ბიომრავალფეროვნების შენარჩუნება იყო. ბოლო ათწლეულებში პარკის მწვანე საფარი მოუვლელობის გამო მნიშვნელოვნად შემცირდა.

12
თსუ. სტუდენტები

თბილისის მერია იწყებს განაცხადების მიღებას სოციალურად დაუცველი სტუდენტების დასაფინანსებლად

417
(განახლებულია 18:15 26.02.2021)
სწავლის საფასურის დაფინანსების შესახებ განცხადების მიღება პირველი მარტიდან დაიწყება და 31 მაისის ჩათვლით გაგრძელდება

თბილისი, 26 თებერვალი – Sputnik. თბილისის მერია პირველი მარტიდან სოციალურად დაუცველი სტუდენტების სწავლის საფასურის დაფინანსების მიზნით, 2020-2021 სასწავლო წლის გაზაფხულის სემესტრისთვის განცხადებების მიღებას იწყებს, ნათქვამია თბილისის მერიის მიერ გავრცელებულ განცხადებაში.

გავრცელებული ინფორმაციით, სოციალურად დაუცველი სტუდენტების დაფინანსების პროგრამის მოცულობა გაიზარდა.

„დაფინანსება გაიცემა თბილისში რეგისტრირებულ სოციალურად დაუცველ იმ სტუდენტებზე, რომელთა ოჯახების სარეიტინგო ქულა სოციალურად დაუცველთა ერთიან ბაზაში 150 000 ან ნაკლებია და სახელმწიფოს მიერ ავტორიზებულ უმაღლეს საგანმანათლებლო დაწესებულებაში ბაკალავრიატის, მაგისტრატურის ან დოქტორანტურის აკადემიურ საფეხურზე სწავლობენ“, - ნათქვამია უწყების განცხადებაში.

დაფინანსების ოდენობა, რომელიც წლიურად შეადგენს 2.250 ლარს, დამოკიდებულია სტუდენტის მიერ წინა სემესტრში მიღებულ აკადემიურ მოსწრებაზე. კერძოდ:

  • 91-100 ქულა - სემესტრული თანხის 100% იმ სტუდენტებისთვის, რომელთა სარეიტინგო ქულა სოციალურად დაუცველი ოჯახების მონაცემთა ერთიან ბაზაში 150 000-ის ტოლი ან ნაკლებია.
  • 71-90 ქულა - სემესტრული თანხის 100% იმ სტუდენტებისთვის, რომელთა სარეიტინგო ქულა სოციალურად დაუცველი ოჯახების მონაცემთა ერთიან ბაზაში არ აღემატება 70 000-ს, ხოლო იმ სტუდენტებისთვის, რომელთა სარეიტინგო ქულა 70 010 -150 000-ია, სემესტრული თანხის 70%;
  • 51–70 ქულა - სემესტრული თანხის 50% იმ სტუდენტებისთვის, რომელთა სარეიტინგო ქულა სოციალურად დაუცველი ოჯახების მონაცემთა ერთიან ბაზაში ტოლია ან ნაკლებია 150 000-ზე.

დაფინანსების მისაღებად სტუდენტმა თბილისის მერიაში უნდა წარადგინოს:

  • პირადობის მოწმობის ასლი;
  • ამონაწერი სოციალურად დაუცველი ოჯახების ერთიანი ბაზიდან;
  • ცნობა უნივერსიტეტიდან წლიური გადასახადის მითითებით;
  • უნივერსიტეტის საბანკო რეკვიზიტები და ანგარიშფაქტურა;
  • უნივერსიტეტის მიერ გაცემული აკადემიური მოსწრების მაჩვენებელი (გარდა I სემესტრის სტუდენტებისა);
  • რეკომენდაცია უმაღლესი საგანმანათლებლო დაწესებულებიდან (გარდა I სემესტრის სტუდენტებისა); სამოტივაციო წერილი.

რაც შეეხება პირველი სემესტრის სტუდენტებს, სხვა დოკუმენტებთან ერთად, მათ უნდა წარადგინონ ერთიან ეროვნულ გამოცდებში მიღებული ქულებისა და შედეგების შესახებ ცნობა.

დოკუმენტაცია და განცხადება სტუდენტმა პირადად უნდა წარადგინოს.

417
თემები:
თბილისის მერია