თელასი

„თელასი": თბილისის რომელ უბნებს შეეზღუდება ელექტროენერგიის მიწოდება 13 ნოემბერს

42
(განახლებულია 13:46 13.11.2020)
გეგმიური სარემონტო სამუშაოების გამო დედაქალაქის სხვადასხვა უბნებში ელექტროენერგიის მიწოდება დროებით შეიზღუდება.

თბილისი, 13 ნოემბერი – Sputnik. სააქციო საზოგადოება „თელასი" იუწყება, რომ 13 ნოემბერს გეგმიური სარემონტო სამუშაოების გამო დედაქალაქში ელექტროენერგიის მიწოდება შეიზღუდება.

ისნის რაიონი

10:00 საათიდან 18:00 საათამდე შეზღუდვა შეეხება: წმინდა ქეთევან დედოფლის გამზირის, ალიხანიანის, ლაგოდეხის, სევანის, ფაღავას, ირბახის და წურწუმიას ქუჩების მოსახლეობას.

საბურთალოს რაიონი

11:00 საათიდან 16:00 საათამდე შეზღუდვა შეეხება: სოფელი დიღმის (ნაწილობრივ), დიდი დიღმის III მიკრორაიონის, ნუცუბიძის პლატო III მიკრორაიონის I, III კვარტლების, დემეტრე თავდადებულის, პაბლო პიკასოს და ზურაბ მუზაშვილის ქუჩების მოსახლეობას.

ვაკის რაიონი

11:00 საათიდან 16:00 საათამდე შეზღუდვა შეეხება: დაბა წყნეთის მოსახლეობას.

კრწანისის რაიონი

11:00 საათიდან 17:00 საათამდე შეზღუდვა შეეხება: დადიანის და ასათიანის (ნაწილობრივ) ქუჩების მოსახლეობას.

გლდანის რაიონი

10:00 საათიდან 16:00 საათამდე შეზღუდვა შეეხება: გლდანის მასივის VI, VII, VIII მიკრორაიონების, ხერგიანის, პატარა ტბის, კოტე მარჯანიშვილის (გლდანი), კარლო მებაღიშვილის და ქერჩის ქუჩების მოსახლეობას.

მთაწმინდის და კრწანისის რაიონები

11:00 საათიდან 18:00 საათამდე შეზღუდვა შეეხება: დაბა წავკისის (ნაწილობრივ) მოსახლეობას.

დიდუბის რაიონი

11:00 საათიდან 13:00 საათამდე შეზღუდვა შეეხება: წერეთლის გამზრის (ნაწილობრივ) მოსახლეობას.

ნაძალადევის რაიონი

11:00 საათიდან 15:00 საათამდე შეზღუდვა შეეხება: სანზონის დასახლების (ნაწილობრივ) მოსახლეობას.

კომპანია ბოდიშს უხდის მომხმარებლებს შექმნილი დისკომფორტის გამო. სამუშაოების დასრულების შემდეგ აბონენტებს ელექტრომომარაგება აღუდგება.

42
თემები:
თბილისი დღეს (1815)
თბილისი

თბილისის ზოგიერთ ქუჩაზე ტრანსპორტის მოძრაობა იზღუდება

41
(განახლებულია 20:11 23.11.2020)
მუხათგვერდის ქუჩიდან ფარნავაზ მეფის გამზირისა და 100 ათასი მოწამის ქუჩის კვეთამდე გზის სარეაბილიტაციო სამუშაოებია დაგეგმილი.

თბილისი, 23 ნოემბერი – Sputnik. მუხათგვერდის ქუჩიდან ფარნავაზ მეფის გამზირისა და 100 ათასი მოწამის ქუჩის კვეთამდე ტრანსპორტის მოძრაობა დროებით შეიზღუდება, იუწყება დედაქალაქის მერია.

უწყების ცნობით, ტრანსპორტის მოძრაობის შეზღუდვის მიზეზი ამ ქუჩებზე დაგეგმილი სარეაბილიტაციო სამუშაოებია.

„დაგეგმილი სამუშაოებიდან გამომდინარე, მიმდინარე წლის 24 ნოემბრიდან 6 დეკემბრის ჩათვლით მუხათგვერდის ქუჩაზე ავტომობილების გადაადგილების სქემა დროებით შეიცვლება. ტრანსპორტის მოძრაობა შესაძლებელი იქნება ფარნავაზ მეფის გამზირის, გიორგი ბალანჩინის ქუჩის, მირიან მეფის ქუჩისა და დავით აღმაშენებლის ხეივნის გავლით“, – აღნიშნულია მერიის ინფორმაციაში.

სამუშაოების წარმოების პერიოდში საზოგადოებრივი ტრანსპორტის მარშრუტიც შეიცვლება. კერძოდ, N84 ავტობუსი დიდ დიღომში მირიან მეფის ქუჩიდან ფარნავაზ მეფის გამზირის გავლით გადაადგილდება, ხოლო შემდგომ სვლას დადგენილი მარშრუტით განაგრძობს. ავტობუსი უკუმიმართულებითაც იმავე მარშრუტით იმოძრავებს. 

41
თემები:
თბილისი დღეს (1815)
წიგნები

„თბილისი წიგნის მსოფლიო დედაქალაქი 2021“ სასკოლო ბიბლიოთეკები წიგნებით შეივსება

40
(განახლებულია 18:57 23.11.2020)
დედაქალაქის მერიის ინფორმაციით, UNESCO-ს გადაწყვეტილებით, თბილისი წიგნის მსოფლიო დედაქალაქის სტატუსს 2021 წლის 23 აპრილს გადმოიბარებს.

თბილისი, 23 ნოემბერი – Sputnik. „თბილისი – წიგნის მსოფლიო დედაქალაქი 2021“-ის ფარგლებში თბილისის საჯარო სკოლების ბიბლიოთეკების ვაუჩერიზაციის პირველი ეტაპი დაიწყო.

პროექტის პირველი ეტაპი ნუმერაციული თანმიმდევრობით თბილისის 62 სკოლას მოიცავს. თითოეულ სკოლას 900 ლარის ღირებულების ვაუჩერი გადაეცემა, რომლითაც საქართველოში მოქმედი 30-ზე მეტი გამომცემლობისა და წიგნის გამავრცელებელი ორგანიზაციის წიგნებს შეიძენენ.

პროექტის მიზანია თბილისის საჯარო სკოლების ბიბლიოთეკების უახლესი გამოცემებით შევსება, სკოლის მოსწავლეების თანამედროვე ლიტერატურულ პროცესთან დაახლოება და წიგნიერების ხარისხის გაზრდა.

ვაუჩერიზაციის პროექტი 2021 წელსაც გაგრძელდება და წლის ბოლომდე თბილისის ყველა საჯარო სკოლის ბიბლიოთეკის ფონდი განახლდება, მოსწავლეები მათთვის საინტერესო ლიტერატურის გაცნობას შეძლებენ.

თბილისის მერის მოადგილის ანდრია ბასილაიას განცხადებით, UNESCO-ს გადაწყვეტილებით, თბილისი წიგნის მსოფლიო დედაქალაქის სტატუსს ოფიციალურად მომავალი წლის აპრილში გადმოიბარებს, მანამდე კი მოსამზადებელი სამუშაოები მიმდინარეობს.

„საგანმანათლებლო მიმართულება თბილისის მერიისთვის ყოველთვის პრიორიტეტული იყო, ამიტომ მოხარული ვარ, რომ პროექტის განხორციელებას კონკრეტულად სკოლის მოსწავლეებისთვის დაგეგმილი აქტივობით ვიწყებთ“, – განაცხადა ანდრია ბასილაიამ.

როგორც თბილისის მერიის მულტიფუნქციური ბიბლიოთეკების გაერთიანებისა და პროექტ „თბილისი – წიგნის მსოფლიო დედაქალაქი 2021“-ის დირექტორმა ნინია მაჭარაშვილმა განაცხადა, თბილისის საჯარო სკოლების ბიბლიოთეკების ახალი წიგნებით შევსება პროექტის ერთ-ერთი მთავარი კომპონენტია.

„პროექტი რამდენიმე ეტაპად განხორციელდება და ყველა საჯარო სკოლას მოიცავს. ვაუჩერიზაციის პროცესი მნიშვნელოვანია როგორც სკოლის მოსწავლეებისთვის, ისე ადგილობრივი გამომცემლებისთვის, რომლებიც პანდემიის გამო მნიშვნელოვნად დაზარალდნენ“, – განაცხადა მაჭარაშვილმა.

„ბიბლიოთეკასთან ყოველდღე 5 ახალი წიგნი იდება, წაიღეთ და ნუ დააბრუნებთ“ – გიორგი კეკელიძე>>

ამასთან, საქართველოს წიგნის გამომცემელთა და გამავრცელებელთა ასოციაციის თავმჯდომარის მოადგილის გვანცა ჯობავას თქმით, ბიბლიოთეკების წიგნადი ფონდების შევსება საქართველოს წიგნის გამომცემელთა და გამავრცელებელთა ასოციაციისთვის ყოველთვის პრიორიტეტული იყო.

„ამ პროექტმა მოგვცა უნიკალური შესაძლებლობა, რომ ამჯერად თბილისის სკოლების ბიბლიოთეკები შევავსოთ. ეს მოგვცემს საშუალებას... სკოლა და თანამედროვე ლიტერატურული პროცესი დავაახლოვოთ ერთმანეთთან, სკოლის ბიბლიოთეკა კი მოსწავლეებისთვის ბევრად მიმზიდველ სივრცედ გადავაქციოთ, სადაც ახალი წიგნი აუცილებლად მოიყვანს ახალ მკითხველს“, – აღნიშნა გვანცა ჯობავამ.

თბილისი წიგნის მსოფლიო დედაქალაქის სტატუსს 2021 წლის 23 აპრილს კუალა–ლუმპურისგან გადმოიბარებს. პროექტის ფარგლებში ერთი წლის განმავლობაში დაგეგმილია 100-ზე მეტი საგანმანათლებლო, შემეცნებითი, ინფრასტრუქტურული, მასობრივი და საბავშვო პროექტის განხორციელება.

UNESCO World Book Capital (წიგნის მსოფლიო დედაქალაქი) – ფართომასშტაბიანი პროექტია, რომელიც 2002 წელს UNESCO-ს გენერალური კონფერენციის გადაწყვეტილებით დაარსდა.

პროექტი მიზნად ისახავს წიგნისა და კითხვის პოპულარიზაციას, ხელს უწყობს წიგნის ინდუსტრიისა და მასთან დაკავშირებული ყველა სფეროს განვითარებას, თანამედროვე ავტორების, მთარგმნელების, ბიბლიოთეკებისა და გამომცემლების ხელშეწყობას.

პროექტი თბილისის მერიის, თბილისის მულტიფუნქციური ბიბლიოთეკების გაერთიანებისა და საქართველოს წიგნის გამომცემელთა და გამავრცელებელთა ასოციაციის ორგანიზებით ხორციელდება.

40
თემები:
თბილისი დღეს (1815)
პოლიციის განყოფილება

დაჭრა გლდანის „კარფურში“: ცნობილია საქმის ახალი დეტალები

0
დაკავებულ მამაკაცს შემაკავებელი ორდერით გათვალისწინებული მოთხოვნებისა და ვალდებულებების შეუსრულებლობისა და ოჯახის წევრის მიმართ განზრახ მკვლელობის მცდელობისთვის 17 წლამდე პატიმრობა ემუქრება

თბილისი, 23 ნოემბერი - Sputnik. 44 წლის მამაკაცს, რომელმაც დღეს გლდანის „კარფურში“ ყოფილი მეუღლე საკანცელარიო დანით დაჭრა, შემაკავებელი ორდერი ჰქონდა გამოწერილი, იუწყება შსს-ს პრესსამსახური.

ინციდენტი ცოტა ხნის წინ მოხდა. 37 წლის ქალი მისსავე სამსახურში მისმა ყოფილმა ქმარმა დაჭრა. ბოროტმოქმედი დანაშაულის ჩადენის შემდეგ ადგილზევე დააკავეს.

შინაგან საქმეთა სამინისტროს თანამშრომლებმა ა.გ. შემაკავებელი ორდერით გათვალისწინებული მოთხოვნებისა და ვალდებულებების შეუსრულებლობისა და ოჯახის წევრის მიმართ განზრახ მკვლელობის მცდელობის ბრალდებით დააკავეს.

მამაკაცი წარსულში ნასამართლევია.

ბრალდებულმა ყოფილ მეუღლეს მისსავე სამსახურში მიაკითხა, რითაც დაარღვია შემაკავებელი ორდერი და საკანცელარიო დანით ყელის არეში ჭრილობა მიაყენა.

დაშავებული ქალი სამედიცინო დაწესებულებაში მოათავსეს. მის სიცოცხლეს საფრთხე არ ემუქრება.

გლდანის „კარფურში“ მამაკაცმა ყოფილი ცოლი დაჭრა >>

სამართალდამცველებმა დანაშაულის ჩადენის იარაღი - საკანცელარიო დანა ნივთმტკიცების სახით ამოიღეს.

გამოძიება დაწყებულია სსკ-ის 11 პრიმა 381-ე პრიმა მუხლის პირველი ნაწილით და 11 პრიმა-19-109-ე მუხლის მეორე ნაწილით, რაც გულისხმობს შემაკავებელი ორდერით გათვალისწინებული მოთხოვნებისა და ვალდებულებების შეუსრულებლობასა და ოჯახის წევრის მიმართ განზრახ მკვლელობის მცდელობას და 13-დან 17 წლამდე ვადით თავისუფლების აღკვეთას ითვალისწინებს.

0
თემები:
კრიმინალი საქართველოში