ავტობუსი თბილისში

თბილისში საზოგადოებრივი ტრანსპორტის ქსელს კიდევ 13 მარშრუტი ემატება

83
(განახლებულია 17:39 04.11.2020)
დედაქალაქში 7 ნოემბრიდან საზოგადოებრივი ტრანსპორტის ინფრასტრუქტურას ჯამში 47 ერთეული მიკროავტობუსი და 42 ერთეული ავტობუსი ემატება.

თბილისი, 4 ნოემბერი – Sputnik. თბილისში 7 ნოემბრიდან საზოგადოებრივი ტრანსპორტის ქსელს კიდევ 13 მარშრუტი ემატება, განაცხადა თბილისის მერმა კახა კალაძემ დედაქალაქის მთავრობის დღევანდელ სხდომაზე.

ამ ეტაპისთვის თბილისში სწრაფი სატრანზიტო დერეფნების მოწყობა მიმდინარეობს. პირველი სწრაფი სატრანზიტო დერეფანი და მისი მკვებავი საქალაქო და საუბნო მარშრუტები 24 ოქტომბრიდან ამოქმედდა.

კალაძის განცხადებით, საქალაქო ავტობუსებს ხუთი მარშრუტი, ხოლო მიკროავტობუსების მარშრუტს რვა საუბნო მნიშვნელობის ხაზი დაემატა.

„მინდა მოგაწოდოთ ინფორმაცია ახალ ქსელზე, რომელიც ქალაქის მასშტაბით სხვადასხვა რაიონში გადანაწილდება. საზოგადოებრივი ტრანსპორტის ქსელს 13 ახალი მარშრუტი ემატება. აღნიშნულ მარშრუტებზე მხოლოდ და მხოლოდ ახალი ტრანსპორტი ივლის“, – აღნიშნა კახა კალაძემ.

7 ნოემბრიდან ჯამში საზოგადოებრივი ტრანსპორტის ინფრასტრუქტურას 47 ერთეული მიკროავტობუსი და 42 ერთეული ავტობუსი ემატება.

ავტობუსების მარშრუტები შემდეგნაირად ნაწილდება:

N343 ზემო ფონიჭალა – ვაზისუბნის დასახლება;

N344 ზემო ფონიჭალა – ბარათაშვილის ქუჩა;

N363 თხინვალა – მეტროს სადგური „დელისი“ – უნივერსიტეტის მაღლივი კორპუსი;

N383 ქავთარაძე – ზემო ვაკე – ბარათაშვილის ქუჩა;

N387 წრიული – საბურთალო – ვაკე – საბურთალო.

რაც შეეხება მიკროავტობუსებს, ისინი შემდეგ მარშრუტებზე იმოძრავებენ:

N482 ახალდაბა – წყნეთი;

N483 წყნეთი – წრიული;

N419 სოფ. აგარაკი – მეტრო „სახელმწიფო უნივერსიტეტი“;

N463 – ზაჰესი (ჭიჭინაძისა და ცქიტიშვილის ქუჩები);

N464 – ბილფელდის, ჩიქოვანის ქუჩა, სპორტის სასახლე;

N408 აეროპორტის დასახლება – ალექსეევკას დასახლება – მეტროს სადგური „ისანი“;

N457 „სადგურის მოედანი“ – ჯავახიშვილის ქუჩა – ბესიკის ქუჩა;

N476 მეტროს სადგური „სახელმწიფო უნივერსიტეტი“, ანჯაფარიძის, ქავთარაძის, ნუცუბიძის, შარტავას ქუჩა, სადგურის მოედანი.

მერიის ცნობით, მგზავრები ახალ ხაზებთან დაკავშირებულ ინფორმაციას გაჩერებებზე განთავსებული ბილბორდების საშუალებით მიიღებენ.

კალაძე: ჭავჭავაძის გამზირზე მოძრაობის განტვირთვისთვის ახალი გზის პროექტი მუშავდება>>

ახალი საავტობუსო ქსელის გაშვებით საშუალო მოცდის დრო შემცირდება 7 წუთამდე (მინიმუმ 3 წუთი, მაქსიმუმ 15 წუთი), ხოლო ავტობუსებში მგზავრთა ტევადობა გაიზრდება 2.5-ჯერ. შესაბამისად, 1 საათში გადასაყვანი მგზავრების ტევადობა 27000-დან ავიდა 67800 ერთეულამდე. აღნიშნულის გათვალისწინებით, მოქალაქეებისთვის მცირდება მგზავრობისა და მოცდის დრო.

ახალ მარშრუტებზე მოძრავ ავტობუსებსა და მიკროავტობუსებში თანხის გადახდა შესაძლებელია მხოლოდ ბარათის საშუალებით, მგზავრობის დასაწყისშივე. ახალი მიკროავტობუსების მძღოლების ანაზღაურება კი იქნება ფიქსირებული, რითიც მარშრუტზე მოძრაობის გრაფიკიდან გადაცდომის და მგზავრის ფეხზე დგომის პრევენცია მოხდება.

მიკროავტობუსების ხაზების მონიტორინგი თანამედროვე GPS და მგზავრთა მთვლელი სისტემების გამოყენებით განხორციელდება.

მუნიციპალური ავტოპარკის განახლების პროექტის ფარგლებში თბილისის სატრანსპორტო კომპანიამ 226 ერთეული 12-მეტრიანი, EURO 6-ის სტანდარტის ავტობუსი შეისყიდა. მათი ნაწილი უკვე დედაქალაქშია, დანარჩენი კი 2021 წლის მარტამდე ეტაპობრივად შემოვა. 2021 წელს ასევე დაგეგმილია 180 ერთეული 18-მეტრიანი ავტობუსების შეძენა.

ახალი ავტობუსები, მიკროავტობუსები და ახალი მარშრუტები: რა სიახლეები ელოდება თბილისელებს>>

გარდა ავტობუსებისა, პროექტის ფარგლებში შესყიდულია 300 ერთეული FORD-ის მარკის, დიზელის ძრავზე მომუშავე, „ევრო 5“ ემისიის, ეკოლოგიურად სუფთა მიკროავტობუსი. მიკროავტობუსების სრულად შემოყვანისთვის განსაზღვრულია 180 კალენდარული დღე.

83
თემები:
თბილისი დღეს (1815)
თბილისი

თბილისის ზოგიერთ ქუჩაზე ტრანსპორტის მოძრაობა იზღუდება

44
(განახლებულია 20:11 23.11.2020)
მუხათგვერდის ქუჩიდან ფარნავაზ მეფის გამზირისა და 100 ათასი მოწამის ქუჩის კვეთამდე გზის სარეაბილიტაციო სამუშაოებია დაგეგმილი.

თბილისი, 23 ნოემბერი – Sputnik. მუხათგვერდის ქუჩიდან ფარნავაზ მეფის გამზირისა და 100 ათასი მოწამის ქუჩის კვეთამდე ტრანსპორტის მოძრაობა დროებით შეიზღუდება, იუწყება დედაქალაქის მერია.

უწყების ცნობით, ტრანსპორტის მოძრაობის შეზღუდვის მიზეზი ამ ქუჩებზე დაგეგმილი სარეაბილიტაციო სამუშაოებია.

„დაგეგმილი სამუშაოებიდან გამომდინარე, მიმდინარე წლის 24 ნოემბრიდან 6 დეკემბრის ჩათვლით მუხათგვერდის ქუჩაზე ავტომობილების გადაადგილების სქემა დროებით შეიცვლება. ტრანსპორტის მოძრაობა შესაძლებელი იქნება ფარნავაზ მეფის გამზირის, გიორგი ბალანჩინის ქუჩის, მირიან მეფის ქუჩისა და დავით აღმაშენებლის ხეივნის გავლით“, – აღნიშნულია მერიის ინფორმაციაში.

სამუშაოების წარმოების პერიოდში საზოგადოებრივი ტრანსპორტის მარშრუტიც შეიცვლება. კერძოდ, N84 ავტობუსი დიდ დიღომში მირიან მეფის ქუჩიდან ფარნავაზ მეფის გამზირის გავლით გადაადგილდება, ხოლო შემდგომ სვლას დადგენილი მარშრუტით განაგრძობს. ავტობუსი უკუმიმართულებითაც იმავე მარშრუტით იმოძრავებს. 

44
თემები:
თბილისი დღეს (1815)
წიგნები

„თბილისი წიგნის მსოფლიო დედაქალაქი 2021“ სასკოლო ბიბლიოთეკები წიგნებით შეივსება

41
(განახლებულია 18:57 23.11.2020)
დედაქალაქის მერიის ინფორმაციით, UNESCO-ს გადაწყვეტილებით, თბილისი წიგნის მსოფლიო დედაქალაქის სტატუსს 2021 წლის 23 აპრილს გადმოიბარებს.

თბილისი, 23 ნოემბერი – Sputnik. „თბილისი – წიგნის მსოფლიო დედაქალაქი 2021“-ის ფარგლებში თბილისის საჯარო სკოლების ბიბლიოთეკების ვაუჩერიზაციის პირველი ეტაპი დაიწყო.

პროექტის პირველი ეტაპი ნუმერაციული თანმიმდევრობით თბილისის 62 სკოლას მოიცავს. თითოეულ სკოლას 900 ლარის ღირებულების ვაუჩერი გადაეცემა, რომლითაც საქართველოში მოქმედი 30-ზე მეტი გამომცემლობისა და წიგნის გამავრცელებელი ორგანიზაციის წიგნებს შეიძენენ.

პროექტის მიზანია თბილისის საჯარო სკოლების ბიბლიოთეკების უახლესი გამოცემებით შევსება, სკოლის მოსწავლეების თანამედროვე ლიტერატურულ პროცესთან დაახლოება და წიგნიერების ხარისხის გაზრდა.

ვაუჩერიზაციის პროექტი 2021 წელსაც გაგრძელდება და წლის ბოლომდე თბილისის ყველა საჯარო სკოლის ბიბლიოთეკის ფონდი განახლდება, მოსწავლეები მათთვის საინტერესო ლიტერატურის გაცნობას შეძლებენ.

თბილისის მერის მოადგილის ანდრია ბასილაიას განცხადებით, UNESCO-ს გადაწყვეტილებით, თბილისი წიგნის მსოფლიო დედაქალაქის სტატუსს ოფიციალურად მომავალი წლის აპრილში გადმოიბარებს, მანამდე კი მოსამზადებელი სამუშაოები მიმდინარეობს.

„საგანმანათლებლო მიმართულება თბილისის მერიისთვის ყოველთვის პრიორიტეტული იყო, ამიტომ მოხარული ვარ, რომ პროექტის განხორციელებას კონკრეტულად სკოლის მოსწავლეებისთვის დაგეგმილი აქტივობით ვიწყებთ“, – განაცხადა ანდრია ბასილაიამ.

როგორც თბილისის მერიის მულტიფუნქციური ბიბლიოთეკების გაერთიანებისა და პროექტ „თბილისი – წიგნის მსოფლიო დედაქალაქი 2021“-ის დირექტორმა ნინია მაჭარაშვილმა განაცხადა, თბილისის საჯარო სკოლების ბიბლიოთეკების ახალი წიგნებით შევსება პროექტის ერთ-ერთი მთავარი კომპონენტია.

„პროექტი რამდენიმე ეტაპად განხორციელდება და ყველა საჯარო სკოლას მოიცავს. ვაუჩერიზაციის პროცესი მნიშვნელოვანია როგორც სკოლის მოსწავლეებისთვის, ისე ადგილობრივი გამომცემლებისთვის, რომლებიც პანდემიის გამო მნიშვნელოვნად დაზარალდნენ“, – განაცხადა მაჭარაშვილმა.

„ბიბლიოთეკასთან ყოველდღე 5 ახალი წიგნი იდება, წაიღეთ და ნუ დააბრუნებთ“ – გიორგი კეკელიძე>>

ამასთან, საქართველოს წიგნის გამომცემელთა და გამავრცელებელთა ასოციაციის თავმჯდომარის მოადგილის გვანცა ჯობავას თქმით, ბიბლიოთეკების წიგნადი ფონდების შევსება საქართველოს წიგნის გამომცემელთა და გამავრცელებელთა ასოციაციისთვის ყოველთვის პრიორიტეტული იყო.

„ამ პროექტმა მოგვცა უნიკალური შესაძლებლობა, რომ ამჯერად თბილისის სკოლების ბიბლიოთეკები შევავსოთ. ეს მოგვცემს საშუალებას... სკოლა და თანამედროვე ლიტერატურული პროცესი დავაახლოვოთ ერთმანეთთან, სკოლის ბიბლიოთეკა კი მოსწავლეებისთვის ბევრად მიმზიდველ სივრცედ გადავაქციოთ, სადაც ახალი წიგნი აუცილებლად მოიყვანს ახალ მკითხველს“, – აღნიშნა გვანცა ჯობავამ.

თბილისი წიგნის მსოფლიო დედაქალაქის სტატუსს 2021 წლის 23 აპრილს კუალა–ლუმპურისგან გადმოიბარებს. პროექტის ფარგლებში ერთი წლის განმავლობაში დაგეგმილია 100-ზე მეტი საგანმანათლებლო, შემეცნებითი, ინფრასტრუქტურული, მასობრივი და საბავშვო პროექტის განხორციელება.

UNESCO World Book Capital (წიგნის მსოფლიო დედაქალაქი) – ფართომასშტაბიანი პროექტია, რომელიც 2002 წელს UNESCO-ს გენერალური კონფერენციის გადაწყვეტილებით დაარსდა.

პროექტი მიზნად ისახავს წიგნისა და კითხვის პოპულარიზაციას, ხელს უწყობს წიგნის ინდუსტრიისა და მასთან დაკავშირებული ყველა სფეროს განვითარებას, თანამედროვე ავტორების, მთარგმნელების, ბიბლიოთეკებისა და გამომცემლების ხელშეწყობას.

პროექტი თბილისის მერიის, თბილისის მულტიფუნქციური ბიბლიოთეკების გაერთიანებისა და საქართველოს წიგნის გამომცემელთა და გამავრცელებელთა ასოციაციის ორგანიზებით ხორციელდება.

41
თემები:
თბილისი დღეს (1815)
ჯო ბაიდენი

ბაიდენმა ადმინისტრაციის დაკომპლექტება დაიწყო: დასახელდა კანდიდატები საკვანძო პოსტებზე

0
აშშ-ის ეროვნულ უსაფრთხოებას და საგარეო პოლიტიკას უხელმძღვანელებენ გამოცდილი პროფესიონალები, რომლებიც მზად არიან პრინციპული ლიდერობა აღადგინონ

თბილისი, 23 ნოემბერი — Sputnik. აშშ-ის პრეზიდენტობის კანდიდატმა ჯო ბაიდენმა დაასახელა იმ კანდიდატების ვინაობა, რომლებსაც არჩევნებზე გამარჯვების შემთხვევაში თავის ადმინისტრაციაში საკვანძო პოსტებზე მოიაზრებს.

ინფორმაცია ბაიდენის გეგმების შესახებ პოლიტიკოსის შტაბის Twitter-აკაუნტზე გამოქვეყნდა.

ასე, მაგალითად, სახელმწიფო მდივნის პოსტი შეიძლება ტონი ბლინკენმა დაიკავოს, გაეროს მუდმივი წარმომადგენლის თანამდებობა - ლინდა თომას-გრინფილდმა, ხოლო ეროვნული უსაფრთხოების მრჩევლის პოსტი - ჯეიკ სალივანმა. შინაგანი უსაფრთხოების სამინისტროს ხელმძღვანელად მოიაზრება ალეხანდრო მაიორკასი, ხოლო ეროვნული დაზვერვის დირექტორად - ავრილ ჰეინსი. ყოფილმა სახელმწიფო მდივანმა ჯონ კერიმ შესაძლოა დაიკავოს კლიმატის საკითხებში საგანგებო წარმომადგენლის პოსტი.

განცხადებაში ხაზგასმულია: „აშშ-ის ეროვნულ უსაფრთხოებას და საგარეო ;პოლიტიკას უხელმძღვანელებენ გამოცდილი პროფესიონალები, რომლებიც მზად არიან აღადგინონ პრინციპული ლიდერობა მსოფლიო არენაზე და ღირსეული ლიდერობა ქვეყნის შიგნით“.

2020 წლის 3 ნოემბერს აშშ-ში მორიგი საპრეზიდენტო არჩევნები გაიმართა. ამჟამად კერ კიდევ გრძელდება ხმების დათვლა და გარჩევები ამ საკითხზე. მედიის შეფასებით, აშშ-ის დემოკრატიული პარტიის კანდიდატმა ჯო ბაიდენმა გამარჯვებისთვის საჭირო ამომრჩეველთა კოლეგიის ხმათა საკმარისი რაოდენობა მოიპოვა და მოქმედ პრეზიდენტ დონალდ ტრამპს გაუსწრო. დემოკრატმა თავი არჩეულ პრეზიდენტად უკვე გამოაცხადა. თავის მხრივ, ტრამპმა განაცხადა, რომ ბაიდენმა იჩქარა, როდესაც საკუთარ თავს ქვეყნის ახალი ლიდერი უწოდა.

0
თემები:
მსოფლიო დღეს