ფასიანი პარკინგი

თბილისში პარკირების წესების დარღვევაზე ჯარიმები იზრდება

131
(განახლებულია 18:27 22.07.2020)
კახა კალაძის განცხადებით, აღნიშნული ცვლილებების განხორციელება მნიშვნელოვანია, რათა დროულად მოწესრიგდეს ქალაქში არსებული სიტუაცია.

თბილისი, 22 ივლისი — Sputnik. თბილისში პარკირების წესების დარღვევისთვის არსებული ჯარიმების ოდენობა გაიზრდება, განაცხადა თბილისის მერმა კახა კალაძემ დღეს გამართულ დედაქალაქის მთავრობის სხდომაზე.

მისი თქმით, შესაბამისი საკანონმდებლო ცვლილებათა პაკეტი, თბილისის მერიის წინადადების საფუძველზე, საქართველოს პარლამენტმა უკვე დაამტკიცა. როგორც კალაძემ აღნიშნა, ცვლილებები რამდენიმე მიმართულებას შეეხება. 

კერძოდ, ტაქსისთვის განკუთვნილ ადგილზე პარკირება, 10 ლარის ნაცვლად, 50 ლარით დაჯარიმებას დაექვემდებარება. აღნიშნული სივრცეები მხოლოდ A კატეგორიის ტაქსის მძღოლებისთვის არის გამოყოფილი. ელექტრომობილების დამუხტვისთვის განკუთვნილ ადგილებზე პარკირების შემთხვევაშიც ჯარიმა, 10 ლარის ნაცვლად, 50 ლარი გახდება.

გარდა ამისა, ცენტრალურ ქუჩებზე გაჩერებული სატრანსპორტო საშუალების გამოყენება შემოსავლის მიღების მიზნით ითვალისწინებს ჯარიმას 100 ლარის ოდენობით, ხოლო განმეორებით ჩადენის შემთხვევაში – 200 ლარს. ეს პუნქტი ეხება მოვაჭრეებს, რომლებიც „დახლებს“ საკუთარ მანქანებში აწყობენ.

ავტომობილის გზაზე დატოვება სამ თვეზე მეტი ვადით ექვემდებარება 50 ლარით დაჯარიმებას.

„ჩვენ კონკრეტულ რაიონებში ძალიან ბევრი ასეთი შემთხვევა გვაქვს, რაც მოსახლეობის უკმაყოფილებას იწვევს. მოქალაქეებს ექნებათ შესაძლებლობა, ავტომანქანა კონკრეტულ ადგილზე მხოლოდ სამი თვით გააჩერონ“, – განაცხადა კახა კალაძემ.

ამასთან, დედაქალაქის მერის სიტყვებით, პარკირებისთვის აკრძალულ ადგილზე ავტომობილის გაჩერების შემთხვევაში სატრანსპორტო საშუალებას საჯარიმო სადგომზე გადაიყვანენ. თუ კანონდამრღვევი ჯარიმას ათ კალენდარულ დღეში გადაიხდის, მას აღნიშნული ჯარიმის ოდენობა 20%-ით შეუმცირდება.

131
თემები:
თბილისის მერია (260)
თბილისი

როგორი ამინდი იქნება თბილისში ოთხშაბათს, 23 სექტემბერს

40
(განახლებულია 16:17 21.09.2020)
საქართველოს დედაქალაქში ოთხშაბათს ცვალებადი ამინდია მოსალოდნელი, ტემპერატურა აიწევს და 29 გრადუსს მიაღწევს.

თბილისი, 21 სექტემბერი – Sputnik. თბილისში 23 სექტემბერს, ოთხშაბათს უპირატესად ღრუბლიანი ამინდია მოსალოდნელი. შესაძლებელია ხანმოკლე წვიმა ელჭექით.

მინიმალური ტემპერატურა დაფიქსირდება ღამით – პლუს 18 გრადუსი, ხოლო დღისით 29 გრადუსამდე დათბება.

ქარი წამში 10–15 მეტრი სიჩქარით დაუბერავს.

მზე 06:49 საათზე ამოვა და 18:55 საათზე ჩავა.

40
თემები:
ამინდის ზუსტი პროგნოზი თბილისში
თელასი

„თელასი": თბილისის რომელ უბნებს შეეზღუდება ელექტროენერგიის მიწოდება 21 სექტემბერს

63
(განახლებულია 13:59 21.09.2020)
გადაუდებელი სარემონტო სამუშაოების გამო დედაქალაქის სხვადასხვა უბნებში ელექტროენერგიის მიწოდება დროებით შეიზღუდება.

თბილისი, 21 სექტემბერი — Sputnik. სააქციო საზოგადოება „თელასი" იუწყება, რომ 21 სექტემბერს გადაუდებელი სარემონტო სამუშაოების გამო დედაქალაქის სხვადასხვა უბანში ელექტროენერგიის მიწოდება დროებით შეიზღუდება.

ნაძალადევის რაიონი

10:30 საათიდან 18:00 საათამდე შეზღუდვა შეეხება: ზღვისუბნის დასახლების X კვარტლის, ანაპის 414-ე დივიზიის და შატილის ქუჩების მოსახლეობას.

გლდანის რაიონი

11:00 საათიდან 16:00 საათამდე შეზღუდვა შეეხება: მუხიანის IVბ მიკრორაიონის მოსახლეობას.

საბურთალოს რაიონი

12:00 საათიდან 14:00 საათამდე შეზღუდვა შეეხება: პეკინის გამზირის (ნაწილობრივ) მოსახლეობას.

ვაკის რაიონი

10:00 საათიდან 12:00 საათამდე შეზღუდვა შეეხება: არაყიშვილის ქუჩის (ნაწილობრივ) მოსახლეობას.

კომპანია ბოდიშს უხდის მომხმარებლებს შექმნილი დისკომფორტის გამო. სამუშაოების დასრულების შემდეგ აბონენტებს ელექტრომომარაგება აღუდგება.

63
თემები:
თბილისი დღეს
ადვოკატი მიხეილ რამიშვილი

ბაჩალიაშვილის დაღუპვის ადგილის თანამგზავრულ ფოტოებს დამოუკიდებელი ექსპერტები შეამოწმებენ

0
საქართველოს პროკურატურამ თანამგზავრიდან გადაღებული ფოტოების ექსპერტიზა უკვე ჩაატარა და ისინი გაყალბებულად ცნო

თბილისი, 21 სექტემბერი - Sputnik. საქართველოს უსაფრთხოების პრობლემების ანტიკრიზისული ცენტრის ხელმძღვანელი დავით ფურცხვანიძე აპირებს დამოუკიდებელი ექსპერტიზის ჩატარებას იმ ადგილის თანამგზავრიდან გადაღებული ფოტოების ნამდვილობის დასადგენად, სადაც გარდაცვლილი თამარ ბაჩალიაშვილის მანქანა აღმოაჩინეს.

ბაჩალიაშვილის ოჯახის ადვოკატმა მიხეილ რამიშვილმა სექტემბრის დასაწყისში წარმოადგინა თანამგზავრიდან გადაღებული სოფელ მაწევანთან მიმდებარედ იმ ადგილის რამდენიმე ფოტო, სადაც დაღუპული თამარ ბაჩალიაშვილის მანქანა იპოვეს.

როგორც რამიშვილი ამტკიცებს, ფოტოები გადაღებულია 19-22 ივლისს და მათზე ჩანს, რომ მანქანა იმ ადგილას არ დგას. როგორც მოგვიანებით გაირკვა, ფოტოები ადვოკატს დავით ფურცხვანიძემ გადასცა.

პროკურატურაში განაცხადეს, რომ გამოძიებისთვის მიწოდებული ფოტოები ფალსიფიცირებულია.

დღეს გამართულ პრესკონფერენციაზე ფურცხვანიძემ აღნიშნა, რომ გამოძიებას მიაწოდა ინფორმაცია პირზე, რომელმაც მას აღნიშნულ ფოტოები გადასცა. მისთვის გაურკვეველია, რატომ არ ახმაურებს გამოძიება ინფორმაციას წყაროს შესახებ.

ფურცხვანიძემ პროკურატურის ექსპერტიზის დასკვნებს უნდობლობა გამოუცხადა და მას „არაკვალიფიციური“ უწოდა.

„რამდენიმე დღეში გამოქვეყნდება პასუხის პასუხი, სადაც დადასტურებული იქნება, რომ ეს არ არის ექპერტიზის კვალიფიციური პასუხი და ასევე, ჩვენ ძალიან მალე დამატებით სხვა თანამგზავრებიდან გვექნება იმ ადგილის კადრების დუბლირება“, - განაცხადა ფურცხვანიძემ.

თამარ ბაჩალიაშვილი ხუთდღიანი ძიების შემდეგ საკუთარ მანქანაში თეთრიწყაროს რაიონში გარდაცვლილი იპოვეს. გამოძიების მთავარი ვერსია თვითმკვლელობაა, თუმცა ოჯახს ამის არ სჯერა. ისინი ფიქრობენ, რომ ეს მკვლელობაა და უკავშირდება გოგონას სამუშაოს. მათი მტკიცებით, პროგრამისტს ხელში გარკვეული კომპრომატი ჩაუვარდა.

გარდაცვლილი გოგონას დედა თეონა თამაზაშვილი აცხადებს, რომ მისი ქალიშვილის გარდაცვალება უკავშირდება მთიანი ყარაბაღის ომის დროს იარაღის მიწოდების სქემის გაშიფვრას.

როგორც გაირკვა, აშშ-ის ფედერალური გამოძიების ბიურომ უარი განაცხადა 23 წლის პროგრამისტის გარდაცვალების გარემოებათა გამოძიებაში მონაწილეობაზე, როგორც ამას დაღუპულის ოჯახი ითხოვდა, და აღნიშნა, რომ საქმე მათ კომპეტენციას სცდება.

გამოძიება ბაჩალიაშვილის საქმეზე ორი მუხლით მიმდინარეობს: „თავისუფლების უკანონო აღკვეთა“ და „თვითმკვლელობამდე მიყვანა“.

0
თემები:
გახმაურებული სასამართლო პროცესები