თბილისი, 19 თებერვალი — Sputnik. თბილისში იურიდიული პირებისთვის დასუფთავების გადასახადი, დიდი ალბათობით, გაიზრდება.
თბილისის მერმა კახა კალაძემ თავის მოადგილეებს ამ საკითხზე მუშაობის დაწყება დაავალა.
როგორც მერმა დედაქალაქის მთავრობის სხდომაზე განაცხადა, დასუფთავების მოსაკრებელი ფიზიკური და იურიდიული პირებისთვის თითქმის ერთნაირია, რაც უსამართლობაა.
„მინდა დავავალო ირაკლი ხმალაძესა და მაია ბითაძეს, რომ დაიწყონ მოძიება, თუ როგორი მიდგომაა განვითარებულ ქვეყნებში მოსაკრებლის ამოღების... დავიწყოთ შესწავლა და შემდეგ უკვე მივიღოთ გადაწყვეტილებები, რომელიც უკვე მნიშვნელოვანი იქნება „თბილსერვის ჯგუფის" მუშაობის გაგრძელებისთვის, რათა ის ხარისხი შევინარჩუნოთ, რაც ამ მიმართულებით გვაქვს", – განაცხადა კალაძემ.
ლილოს ნაგავსაყრელს ბუნებრივი გაზის მოპოვების წყაროდ გარდაქმნიან>>
დასუფთავებისთვის გადასახადი ქალაქის საკრებულომ 2014 წლის 12 დეკემბერს დაადგინა. დადგენილების თანახმად, გადასახადი ერთ სულ მოსახლეზე თბილისში 2,5 ლარს შეადგენს. ფიზიკური პირებისთვის, ვისი სოციალური რეიტინგიც 57 ათასი ქულა ან ამაზე ნაკლებია – 2 ლარს.