თბილისი, 7 ოქტომბერი – Sputnik. გლდანის რაიონში მიმდინარე სარემონტო სამუშაოების გამო ტრანსპორტის მოძრაობა დროებით შეიზღუდება. ამის შესახებ დედაქალაქის მერიის განცხადებაშია საუბარი.
შეზღუდვა იმოქმედებს ორშაბათის 23:00 საათიდან ოთხშაბათის 23:00 საათამდე.
ტრანსპორტის მოძრაობა შეიზღუდება ხიზანიშვილის ქუჩის ერთ მონაკვეთზე, ვეკუას ქუჩაზე ტრანსპორტი იმოძრავებს ცალმხრივად – მაისურაძის ქუჩიდან პოლიციის მიმართულებით.
დროებით შეიცვლება საზოგადოებრივი ტრანსპორტის მარშრუტიც. კერძოდ, ეს შეეხება №23, №33, №24 და №51 ავტობუსებს.
მასშტაბური სარემონტო სამუშაოები ვეკუასა და ხიზანიშვილის ქუჩებზე მიმდინარე წლის მაისში დაიწყო და 2020 წლის იანვარში უნდა დასრულდეს.
პრემიერი: გზებს იქაც გავიყვანთ, სადაც არასდროს ყოფილა >>
სექტემბრის ბოლოს თბილისის მერმა კახა კალაძემ აღნიშნულ მონაკვეთზე მომუშავე კომპანიები უკანასკნელად გააფრთხილა და სამუშაო პროცესში დარღვევებზე მიუთითა. ქალაქის თავმა კომპანიებს მოუწოდა, კეთილსინდისიერად შეესრულებინათ სამუშაო და დაემატებინათ ჯგუფები საქმის თავის დროზე დასასრულებლად.
