ფორსაჟი

ახალი „ფორსაჟის“ სცენებს თბილისში გადაიღებენ

381
(განახლებულია 10:37 15.08.2019)
პერიოდულად გადაიკეტება რუსთაველისა და ვაჟა–ფშაველას გამზირები, ასევე, ძველი თბილისის ნაწილი

თბილისი, 14 აგვისტო – Sputnik. კინოკომპანია Universal–ის ცნობილი ჰოლივუდური ფრანშიზის „ფორსაჟის“ ფინალური, მეცხრე ნაწილის ახალი ეპიზოდის გადაღება თბილისის ქუჩებში, სავარაუდოდ, 18–20 აგვისტოს დაიწყება, იუწყება ტელეკომპანია „იმედი“.

წინასწარი ინფორმაციით, გადაღებები ხუთი კვირა გაგრძელდება. პერიოდულად გადაიკეტება რუსთაველისა და ვაჟა–ფშაველას გამზირები, ასევე, ძველი თბილისის ნაწილი.

ტექნიკური საშუალებების მობილიზება საგამოფენო ცენტრ Expo Georgia–ს ტერიტორიაზე მიმდინარეობს. სააგენტოს „აწარმოე საქართველოში“ და Universal Pictures–ს შორის კონტრაქტის სხვა დეტალები უცნობია.

სააგენტოს „აწარმოე საქართველოში“ ინფორმაციით, ფილმის ქვეყნის ტერიტორიაზე გადაღების პროცესით კომპანია Enkeny Films დაკავდება.

 „ფორსაჟი“ (The Fast and the Furious) – ამერიკული მედიაფრანშიზა, ამ დროისთვის რვა სრულმეტრაჟიანი და ორი მოკლემეტრაჟიანი ფილმისგან შედგება. ფილმები გადაღებულია 2001–2017 წლებში. ის სტუდია Universal–ის ყველაზე დიდი და შემოსავლიანი ფრანშიზაა – ყველა ნაწილის საერთო შემოსავალმა მთელ მსოფლიოში 5,1 მილიარდ დოლარს გადააჭარბა.

2017 წლის ოქტომბერში ცნობილი გახდა, რომ „ფორსაჟი 10“–ის გამოსვლა 2021 წლის 1 აპრილს არის დაგეგმილი.

381
თემები:
თბილისი დღეს (1665)
მზიური

„მზიურში“ გალერეა-მედიათეკა მოეწყობა

24
(განახლებულია 10:26 12.07.2020)
თბილისის მერიაში აცხადებენ, რომ „მზიურის“ მნიშვნელოვან ტურისტულ ადგილად ქცევა იგეგმება, სადაც დასვენებისა და განტვირთვის გარდა, სტუმრები ადგილობრივ თუ საერთაშორისო თანამედროვე ხელოვნებაში მიმდინარე პროცესებს გაეცნობიან.

თბილისი, 12 ივლისი – Sputnik. განახლებულ პარკ „მზიურში“ გალერეა-მედიათეკის მოწყობის პროექტს თბილისის მერის მოადგილე ანდრია ბასილაია  გაეცნო, იუწყება თბილისის მერია.

პროექტის მიზანია შენობას არქიტექტურული სახე შეუნარჩუნდეს და ფუნქციური დატვირთვა შეიძინოს.

პროექტი ითვალისწინებს პარკის ქვედა ნაწილში მდებარე ყოფილი საბაგირო შენობის რეკონსტრუქციას, მის ფუნქციურ დატვირთვასა და თანამედროვე ხელოვნების გალერეა-მედიათეკის მოწყობას.

ანდრია ბასილაია სოციალური საწარმოს - „მზიურის კაფე“ დამფუძნებელ ანა გოგუაძეს შეხვდა და პროექტის დეტალებს გაეცნო.

„აღნიშნულ პროექტზე საინიციატივო ჯგუფი თითქმის ათი წელი მუშაობდა და მიუხედავად იმისა, რომ ქალაქს არაერთი კომერციული შეთავაზება ჰქონდა, გადაწყდა, არსებული სივრცე ხელოვნების დარგისთვის დაგვეთმო და მიგვეცა შესაძლებლობა, განახლებულ „მზიურში“ ბევრი საინტერესო პროექტი განეხორციელებინათ”, - განაცხადა ანდრია ბასილაიამ.

პარკი „მზიური“
photo : courtesy of Ministry of Regional Development and Infrastructure of Georgia

უწყებაში აცხადებენ, რომ „მზიურის“ მნიშვნელოვან ტურისტულ ადგილად ქცევა იგეგმება, სადაც დასვენებისა და განტვირთვის გარდა სტუმრები ადგილობრივ თუ საერთაშორისო თანამედროვე ხელოვნებაში მიმდინარე პროცესებს გაეცნობიან.

„მზიურის“ გალერეა სოციალური, არაკომერციული პროექტია, რომლის იდეასა და შესაძლებლობების განვითარებაზე ფონდი „აჰუაჰუ“ მუშაობს. ბავშვთა ქალაქში გალერეა-მედიათეკას თბილისის მერიის ინფრასტრუქტურის განვითარების საქალაქო სამსახური მოაწყობს, ხოლო შემდეგ, აღნიშნული შენობა-ნაგებობა სოციალურ საწარმოს უზუფრუქტის ხელშეკრულებით გადაეცემა.

პარკი „მზიური" თბილისში 2015 წლის 13 ივნისს მომხდარი წყალდიდობის შედეგად ძალიან დაზიანდა. იმ ღამით ვერეს ხეობაში დაიტბორა საცხოვრებელი სახლები, ზოოპარკი, თამაზ ელიზბარაშვილის ძაღლების კერძო თავშესაფარი, ასევე ქალაქის ცენტრალური ქუჩები.

რამდენიმე დღის წინ პარკში დასრულდა რეაბილიტაცია. სრულად განახლდა საფეხმავლო და ველობილიკები, მოეწყო ახალი დასასვენებელი სივრცეები, საბავშვო სივრცეები, ასევე, სკეიტპარკი.

24
თემები:
თბილისის მერია
კუს ტბის საბაგირო

კუს ტბის საბაგირო გზამ მგზავრების მომსახურება განაახლა

69
(განახლებულია 09:16 12.07.2020)
სატრანსპორტო კომპანიის ცნობით, თითოეულ გონდოლაში დასაშვები იქნება მხოლოდ ოთხი მგზავრი და ერთი გამცილებელი

თბილისი, 11 ივლისი - Sputnik. კუს ტბის საბაგირო გზამ მგზავრების მომსახურება განაახლა, ნათქვამია თბილისის სატრანსპორტო კომპანიის მიერ გავრცელებულ განცხადებაში.

საბაგირო გასული წლის ზაფხულში რემონტზე დაიკეტა. მისი გახსნა 2020 წლის მარტში იგეგმებოდა, მაგრამ კორონავირუსის პანდემიის გამო გადაიდო.

საბაგირო გზა მგზავრებს დღეიდან მოემსახურება, თუმცა გარკვეული შეზღუდვებით.

„საბაგირო გზით სარგებლობისას მგზავრებისთვის უსაფრთხოების ზომების დაცვა სავალდებულოა. კერძოდ, ყოველი მგზავრობისას უნდა გამოიყენონ პირბადე და დაიცვან სოციალური დისტანცია. თითოეულ გონდოლაში დასაშვები იქნება მხოლოდ ოთხი მგზავრი და ერთი გამცილებელი“, – ნათქვამია განცხადებაში.

უწყების ცნობით, შეზღუდვა რიყე-ნარიყალას საბაგირო გზაზე კვლავ ძალაში რჩება, რის გამოც, საბაგირო მგზავრებს დროებით ვერ მოემსახურება.

კუს ტბა საქართველოს დედაქალაქის მაცხოვრებლებისთვის და სტუმრებისთვის პოპულარული დასასვენებელი ადგილია. მიმდებარე ტერიტორიაზე განლაგებულია სპორტული მოედნები, სასეირნო ბილიკები, აქვე არის რამდენიმე კაფე და რესტორანი. ტბასთან ახლოს მდებარეობს თბილისის ეთნოგრაფიული მუზეუმი. კუს ტბაზე მოხვედრა შესაძლებელია მანქანით ან საბაგირო გზით ილია ჭავჭავაძის გამზირიდან. საბაგიროს სადგური ვაკის პარკის ცენტრალურ შესასვლელთან ახლოს მდებარეობს.

დღეისათვის თბილისში ორი მოქმედი საბაგირო გზაა – რიყე-ნარიყალა, რომელიც ევროპის პარკსა და ნარიყალას ციხეს აკავშირებს და კუს ტბის საბაგირო, რომელიც ჭავჭავაძის გამზირს აკავშირებს კუს ტბასთან.

 

69
თემები:
COVID-19 საქართველოში
პეტრას ციხე ციხისძირში

„იმოგზაურე საქართველოში“ - საფრანგეთის ელჩი აჭარაშია

0
(განახლებულია 11:17 12.07.2020)
საფრანგეთის ელჩმა დაათვალიერა ბათუმის ბოტანიკური ბაღი, პეტრას და გონიო-აფსაროსის ციხე, ბათუმის ბულვარი

საქართველოში საფრანგეთის საგანგებო და სრულუფლებიანი ელჩი დიეგო კოლასი აჭარას სტუმრობს, იუწყება საზოგადოებრივი მაუწყებლის პირველი არხი.

დიპლომატს აჭარის მთავრობის თავმჯდომარემ თორნიკე რიჟვაძემ რეგიონის კულტურულ-ისტორიული ღირშესანიშნაობები, მიმდინარე და დაგეგმილი პროექტები გააცნო.

„აჭარაში ვმასპინძლობთ ჩვენი მეგობარი ქვეყნის, საფრანგეთის საგანგებო და სრულუფლებიან ელჩს დიეგო კოლასს. მნიშვნელოვანია, რომ ჩვენი პარტნიორი სახელმწიფოები კარგად იცნობდნენ ჩვენს რეგიონს, მის ტურისტულ პოტენციალს. ვუერთდებით კამპანიას – „იმოგზაურე საქართველოსთვის“, რომელიც შიდა ტურიზმის სტიმულირებას ისახავს მიზნად“, – განაცხადა თორნიკე რიჟვაძემ.

საფრანგეთის ელჩმა დაათვალიერა ბათუმის ბოტანიკური ბაღი, პეტრას და გონიო-აფსაროსის ციხე, ბათუმის ბულვარი, რომელიც უკავშირდება მე-19 საუკუნის ცნობილი ფრანგი მებაღის, მიშელ დალფონსის ბათუმში საქმიანობას.

0
თემები:
ტურიზმი საქართველოში