თბილისი, 29 მაისი — Sputnik. თბილისის მერიამ მუხიანში გასართობი სივრცის „რადიო ქალაქი" მოწყობაზე ტენდერი გამოაცხადა. ამის შესახებ თბილისის მერმა კახა კალაძემ ქალაქის მთავრობის სხდომაზე განაცხადა.
გასართობი კომპლექსი რადიოს ყოფილი ქარხნის ტერიტორიაზე განთავსდება. კონცეფციაზე საერთაშორისო კომპანია Colliers-მა იმუშავა.
„არაერთი შეხვედრა გვქონდა ბიზნეს-სექტორთან, რომელსაც წარვუდგინეთ ჩვენი ხედვა ამ პროექტთან დაკავშირებით და დარწმუნებული ვარ, დიდი იქნება ინტერესი ამ თემაზე. დარწმუნებული ვარ, მაგარი პროექტი გამოვა", - განაცხადა მერმა.
პროექტის რეალიზებას, რომლის საინვესტიციო ღირებულება 50 მილიონი ლარია, ოთხი წელი დასჭირდება. პროექტის განხორცილების შედეგად 200 სამუშაო ადგილი შეიქმნება.
უფრო ადრე კალაძემ განაცხადა, რომ გლდანის, მუხიანისა და თემქის მოსახლეობისთვის ერთ-ერთი საუკეთესო გასართობი ადგილი შეიქმნება.