მიწისქვეშა სადგომი ორბელიანის მოედანზე

თბილისის ცენტრში 150 ავტომობილზე გათვლილი მიწისქვეშა ავტოსადგომი ააშენეს

74
(განახლებულია 10:22 06.11.2018)
ორბელიანის მოედნის ტერიტორიაზე სამუშაოების დასრულება წლის ბოლომდე იგეგმება.

თბილისი, 6 ნოემბერი — Sputnik. ორბელიანის მოედანზე, სადაც აღდგენითი სამუშაოები აქტიურად მიმდინარეობს, დასრულდა 150 ავტომობილზე გათვლილი მიწისქვეშა სადგომის მშენებლობა, ნათქვამია თბილისის მერიის ვებ-გვერდზე განთავსებულ განცხადებაში.

ორბელიანის მოედანზე აღდგენითი სამუშაოები მიმდინარეობს დედაქალაქის მერიისა და თბილისის განვითარების ფონდის პროექტის „ახალი ტფილისის" მეორე ეტაპის ფარგლებში. პროექტის მიზანია ქალაქის ისტორიულ ნაწილში დიდი ტურისტული მარშრუტის შექმნა. პროექტის განსახორციელებლად თბილისის ბიუჯეტიდან 65 მლნ ლარია გამოყოფილი.

„წლის ბოლოსთვის შენობა-ნაგებობების სარეაბილიტაციო სამუშაოები დასრულებული იქნება, რომლის შემდეგაც კეთილმოწყობის სამუშაოები დაიწყება. რამდენიმე მისამართი დაგვემატა, რომელთა რეაბილიტაციის გადაწყვეტილებაც მივიღეთ. ასევე ადგილზე არსებული სკვერის რეაბილიტაციაც გვაქვს დაგეგმილი, რათა აღნიშნული უბანი ერთიან კონტექსტში განახლდეს. დარწმუნებული ვარ, თბილისში ეს როგორც ადგილობრივი მოსახლეობისთვის, ასევე ტურისტებისთვის ერთ-ერთი საუკეთესო ადგილი იქნება", – განაცხადა დედაქალაქის მერმა კახა კალაძემ.

ორბელიანის მოედნის აღდგენის პროექტი ითვალისწინებს 20 მისამართის რესტავრაციას. აქედან სამუშაოები დასრულებულია ორ მათგანზე. ამას გარდა, რიგ მისამართებზე დამთავრებულია დეკორატიული ელემენტებისა და ლითონის მოაჯირების აღდგენა-რესტავრაცია.

აღდგენითი სამუშაოების დასრულების შემდეგ ორბელიანის მოედანზე და მის მიმდებარე ტერიტორიაზე დაგეგმილია კეთილმოწყობის სამუშაოები, რომლის ფარგლებში განახლდება და მოწესრიგდება ე.წ. ყვავილების ბაზარი და სარეკრეაციო სივრცე.

პროექტის ფარგლებში მოედნის მიმდებარე ტერიტორიაზე გაჩნდება კიდევ ერთი საფეხმავლო ზონა.

ორბელიანის მოედანზე 2017 წელს მთლიანად განაახლეს საინჟინრო-საკომუნიკაციო ქსელი და მოაწყვეს ქსელები, რომლებიც ამ ზონაში აქამდე არ ფუნქციონირებდა. სამუშაოების ღირებულებამ 10 მლნ ლარი შეადგინა.

განახლებული აღმაშენებლის გამზირი „ევროპა ნოსტრას" გამარჯვებული გახდა>>

ორბელიანის მოედნის აღდგენის პროექტი 2018 წლის ბოლოს დასრულდება.

თბილისის მერიამ და თბილისის განვითარების ფონდმა მასშტაბური პროექტი „ახალი ტფილისი“ 2016 წელს დაიწყეს. პროექტი გულისხმობს დედაქალაქის ცენტრში ახალი საზოგადოებრივ–სარეკრეაციო ზონებისა და ტურისტული მარშრუტების შექმნას.

 

74
თემები:
თბილისის მერია–2018 (200)
კიკვიძის პარკი

თბილისში კიკვიძის განახლებული პარკი გაიხსნა

84
პარში მოეწყო სპორტული და სამაგიდო თამაშების მოედნები, დასასვენებელი პავილიონები, სარწყავი, განათებისა და ვიდეომეთვალყურეობის სისტემები

თბილისი, 14 ივლისი — Sputnik. თბილისში ვეტერანთა კულტურისა და დასვენების განახლებული პარკი (კიკვიძის) გაიხსნა, იუწყება მერიის ვებგვერდი.

გახსნის ღონისძიებას დედაქალაქის მერი კახა კალაძე და საქართველოს პრემიერ-მინისტრი გიორგი გახარია დაესწრნენ.

თბილისის მერმა მოსახლეობას განახლებული პარკის გახსნა მიულოცა. მისი განცხადებით, პარკში შესაბამისი სივრცე ყველა თაობის ადამიანისთვის მოეწყო.

„თბილისს კიდევ ერთი მნიშვნელოვანი რეკრეაციული სივრცე შეემატა. რაც შეეხება პარკს, იგი მთლიანად იქნა რეაბილიტირებული. გაჩნდა ახალი ზონები, ბავშვებისთვის შესაბამისი ადგილები, სადაც განთავსებულია ატრაქციონები. ყველა თაობის ადამიანისთვის არის შესაბამისი ზონა, სადაც გაქვთ შესაძლებლობა, თქვენი შვილებითა და შვილიშვილებით დაისვენოთ. ნამდვილად მიხარია, რომ ჩვენთან უკვე ჩნდება ის საპარკო კულტურა, რაც ყველა განვითარებულ ქვეყანაშია. ჩვენ გვაქვს პარკების ნაკლებობა, მაგრამ პირობა მაქვს მიცემული თბილისელებისთვის, რომ ჩვენი ქალაქი ევროპაში ყველაზე მწვანე, ყველაზე მოწესრიგებული, განახლებული, უსაფრთხო და კეთილმოწყობილი იქნება“, - განაცხადა კახა კალაძემ.

რეაბილიტაციის ფარგლებში, პარკს შეუერთდა მიმდებარედ არსებული ტერიტორია, მოეწყო სპორტული და სამაგიდო თამაშების მოედნები, დასასვენებელი პავილიონები, სარწყავი, განათებისა და ვიდეომეთვალყურეობის სისტემები.

პარკის ტერიტორიაზე განთავსდა შინაური ცხოველების სასეირნო სივრცე, ველო და სარბენი ბილიკები. ერისთავის ქუჩის მხრიდან კი, მოეწყო პარკში შესასვლელი პანდუსი. რეაბილიტაცია ჩაუტარდა პარკში არსებული შენობებსა და შადრევანს.

ტერიტორიაზე, რომლის ფართობიც 72 ათას 100 კვადრატული მეტრია, ჯამში, 12 ათას 124 ძირი ხე-მცენარე დაირგო. სამუშაოების განსახორციელებლად დედაქალაქის ბიუჯეტიდან 4 მლნ 500 ათასი ლარი გამოიყო.

84
თემები:
თბილისის მერია
ბასტილიის აღების დღეს საფრანგეთის საელჩო საქართველოში განსხვავებულად აღნიშნავს

ბასტილიის აღების დღეს საფრანგეთის საელჩო საქართველოში განსხვავებულად აღნიშნავს

59
(განახლებულია 19:32 14.07.2020)
საფრანგეთმა თავისი ეროვნული დღესასწაულის პატივსაცემად თბილისს საჰაერო ბურთი აჩუქა, საიდანაც ქალაქის მშვენიერი ხედი იშლება.

თბილისი, 14 ივლისი – Sputnik. საფრანგეთის საელჩომ საქართველოში ქვეყნის უმთავრესი დღესასწაულის – ბასტილიის აღების დღეს ტრადიციული მიღების გამართვაზე უარი განაცხადა და ის ღია სივრცეში ღონისძიების გახსნით ჩაანაცვლა.

რიყის პარკში საღამოს ახალი ტურისტული ატრაქციონის გახსნა გაიმართება, რომლის ინვესტორია ფრანგული კომპანია Aerophile – ქალაქის თავზე გიგანტური საჰაერო ბურთი აღიმართება.

„ელჩი დაესწრება რიყის პარკში განთავსებული ახალი ტურისტული ატრაქციონის გახსნას, რათა ხაზი გაუსვას ტურიზმის მიმართ საფრანგეთის მხარდაჭერას როგორც საფრანგეთში, ასევე საქართველოში“, – აღნიშნულია დიპლომატიური მისიის განცხადებაში.

საფრანგეთის საელჩო დღესასწაულს თბილისის ე.წ. „ალექსანდროვის ბაღში“ ღამის ფეიერვერკით დაასრულებს.

საფრანგეთი იმ ხუთი ქვეყნის ჩამონათვალშია, რომლებისთვისაც საქართველომ კორონავირუსის პანდემიის ფონზე თავისი საზღვრები გახსნა.

„ეს ორი ქვეყანა ერთ-ერთი პირველები იყვნენ, რომლებმაც ხელახლა გაუხსნეს ერთმანეთს საზღვრები და ამით პოსტ-covid-19-ის სამყაროში ადამიანების დამაკავშირებელი პირველი ხიდები შექმნეს“, – ნათქვამია განცხადებაში.

პანდემიის გამო საფრანგეთი ეროვნულ დღესასწაულს მოკრძალებულად აღნიშნავს. ჯარის დანაყოფების დათვალიერება მაყურებლის გარეშე არა ელისეს მინდვრებზე, არამედ თანხმობის მოედანზე გაიმართა. ხელისუფლებამ უარი თქვა ჯავშანტექნიკის აღლუმზე და მხოლოდ ავიაცია გამოიყვანა. ბევრ რეგიონში დღესასწაულზე ფეიერვერკი გააუქმეს, ხოლო ყოველწლიური კლასიკური მუსიკის კონცერტის მოსმენა მხოლოდ ტელევიზიით ან ონლაინ არის შესაძლებელი.

„იმოგზაურე საქართველოში“ - საფრანგეთის ელჩი აჭარაშია>>

საფრანგეთის რამდენიმე ქალაქმა, ეპიდემიის უეცრად განახლების შიშით, საერთოდ უარი თქვა ბასტილიის აღების დღესასწაულის გამართვაზე.

59
მამაკაცი ნიღბით ინფექციური საავადმყოფოს ტერიტორიაზე

კორონავირუსი საქართველოში: საგანგებო მდგომარეობის შემდეგ შეზღუდვების სრული სია/15 ივლისი

86721
საქართველოში საგანგებო მდგომარეობა ერთი თვის წინ მოიხსნა, მაგრამ მთავრობამ შეზღუდვების ნაწილი ძალაში დატოვა.

თბილისი, 15 ივლისი – Sputnik. საქართველოს მთავრობა აგრძელებს კორონავირუსის პანდემიის გამო დაწესებული შეზღუდვების მოხსნას, მაგრამ ამავე დროს მთავრობა და ეპიდემიოლოგები მოუწოდებენ მოქალაქეებს გამოიჩინონ სიფრთხილე და დაიცვან ჯანდაცვის სამინისტროს რეკომენდაციები.

ქვეყნის ტერიტორიაზე მოქმედებს შემდეგი შეზღუდვები:

  • დახურულ სივრცეებში, საჯარო დაწესებულებებში, საზოგადოებრივ ტრანსპორტში, ოფისებსა და მაღაზიებში სავალდებულოა პირბადის ტარება და სოციალური დისტანციის დაცვა;
  • საზოგადოებრივ ტრანსპორტში დაუშვებელია პირბადის გარეშე ყოფნა;

  • ტაქსის მძღოლისთვის სავალდებულოა პირბადის ტარება, ტაქსით ორზე მეტი მგზავრის გადაყვანა არ შეიძლება, ისიც უკანა სავარძელზე;
  • აკრძალულია სპორტული ღონისძიებების გამართვა
  • კულტურული და გასართობი ღონისძიებების გამართვა დასაშვებია მხოლოდ ღია სივრცეებში, გამონაკლისია მუზეუმები;
  • კაზინოების და ტოტალიზატორების მუშაობა დაშვებულია მხოლოდ ონლაინ;
  • აკრძალულია 10-ზე მეტი ადამიანის თავშეყრა ტრადიციულ სოციალურ ღონისძიებებზე (ქორწილი, ნებისმიერი იუბილე, ქელეხი და ა.შ.);
  • ადამიანების თავშეყრის ადგილებში აკრძალულია სპლიტ-სისტემის კონდიციონერების გამოყენება, რომლებიც ჰაერს იღებენ შენობიდან, აგრილებენ და ისევ აბრუნებენ. დაშვებულია სამრეწველო კონდიციონერების გამოყენება, რომლებიც კონდიცირება-ვენტილაციის სისტემებს მოიცავს (ჰაერი შენობაში გარედან შეაქვს).

ამ მომენტისათვის ინფიცირებულთა რაოდენობა 999 ადამიანს შეადგენს, აქედან 870 გამოჯანმრთელდა, 15 კი გარდაიცვალა. კიდევ სამი ინფიცირებული მოქალაქე სამკურნალოდ სხვა ქვეყნებიდან ჩამოიყვანეს.

საქართველო სხვა ქვეყნებისთვის კორონავირუსთან ბრძოლაში სამაგალითოა >>

15 ივნისიდან აღდგა შიდა ტურიზმი, ხოლო 1 ივლისიდან საქართველო საზღვრებს უცხოელი ტურისტებისთვის გახსნის.

უწყებათშორისი საკოორდინაციო საბჭო ოპერატიულად აფასებს სიტუაციას და შეიმუშავებს ახალ რეკომენდაციებს და შეზღუდვებს.

მთავრობის სპეციალურ ვებ-გვერდზე stopcov.ge გამოქვეყნებული ბოლო მონაცემების თანახმად, საკარანტინო სივრცეში იმყოფება 5640, სტაციონარებში მეთვალყურეობის ქვეშ კი 244 ადამიანია.

მთავრობა მოსახლეობას მოუწოდებს, ქვეყანაში კორონავირუსთან დაკავშირებით მხოლოდ და მხოლოდ გადამოწმებულ და ოფიციალურად დადასტურებულ ინფორმაციას ენდონ. ყველა ინფორმაციის მოძიება შესაძლებელია მთავრობის მიერ სპეციალურად შექმნილ ვებ-გვერდზე stopcov.ge.

„ცხელი ხაზის“ ნომრები: ცხელი ხაზი კარანტინის რეჟიმის საკითხებზე – 144. საქართველოს ჯანდაცვა – 15 05 (დღე-ღამის განმავლობაში); დაავადებათა კონტროლის ცენტრი – 116 001 (21:00-მდე სამუშაო დღეებში და 18:00-მდე დასვენების დღეებში).

ყველა მოხალისეს, რომელსაც აქვს დრო და სურვილი დაეხმაროს ხანდაზმულ ადამიანებს, ასევე მათ, ვისაც სპეციალური დახმარება ესაჭიროება, შეუძლია დარეკოს მერიის ცხელ ხაზზე (032)2722222 და წითელი ჯვრის ცხელ ხაზზე - 0800 000 018.

 

86721
თემები:
COVID-19 საქართველოში