თბილისი, 8 ნოემბერი — Sputnik. თბილისის მერიასთან არსებული კომპანია „თბილსერვის ჯგუფის" ხელმძღვანელი ლევან ჯღარკავა თბილისელებს საახალწლოდ სიურპრიზების დაპირდა და ამით მათ წინასაახალწლო ინტერესი გაუღვივა.
„ახალ წელთან დაკავშირებით თბილისში გარკვეული სიურპრიზები იგეგმება", — ციტირებს ჯღარკავას ტელეკომპანია Imedi.
მისი სიტყვებით, აღნიშნულ საკითხზე პრეზენტაცია დაახლოებით ერთი კვირის შემდეგ გაიმართება.
კითხვაზე, პარლამენტის შენობის წინ დაიდგმება თუ არა ახალი ნაძვის ხე, ჯღარკავამ განაცხადა, რომ ესეც სიურპრიზია.
წელს თბილისის მერია საახალწლო გაფორმებასა და განათებაზე 3 მლნ ლარის დახარჯვას გეგმავს. სექტემბერში „თბილსერვის ჯგუფმა" სახელმწიფო შესყიდვების სააგენტოს ელექტრონათურებისა და გასანათებელი მოწყობილობების შესაძენად ტენდერის ჩატარების მიზნით მიმართა.
უკვე ცნობილია, რომ საახალწლო განათება ახალი ელემენტებით შეივსება.
რუსთაველის გამზირის გასწვრივ იგეგმება 32 ახალი ოქროსფერი ბაფთის მონტაჟი, რომელთა სიგანე 12 მეტრი იქნება. ამ ბაფთებში „განათებული ცა" გამოჩნდება.
იქვე დაამონტაჟებენ სტრობოსკოპებს, ანუ მოწყობილობებს, რომლებიც გამეორებადი მკაფიო სინათლის იმპულსების სწრაფად წარმოქმნის საშუალებას იძლევა.
ცენტრალურ გამზირზე ხეებს ოქროსფერი ნათურებით მორთავენ.
საახალწლო ნაძვის ხეს ორი მხრიდან ორი ხუთმეტრიანი საახალწლო თაღი დაამშვენებს. გარდა ამისა, გამზირზე ხუთმეტრიან ბურთს დადგამენ.
