თბილისი, 2 მარტი — Sputnik. თბილისის ცენტრალურ ქუჩებში დასაშვები იქნება მხოლოდ მსუბუქი ავტომობილების პარკირება, იუწყება საინფორმაციო სააგენტო Новости-Грузия თბილისის მერიის სატრანსპორტო სამსახურის პრეს-სამსახურზე დაყრდნობით.
კოტე აფხაზის ქუჩაზე ამიერიდან გაჩერება შეეძლებათ მხოლოდ M1 ტიპის სატრანსპორტო საშუალებებს, ანუ მსუბუქ ავტომობილებს.
„ეს გადაწყვეტილება იმითაა გამოწვეული, რომ ამ ადგილებში მოძრაობა გადატვირთულია. მაგალითად, კოტე აფხაზის ქუჩაზე რამდენიმე მისაბმელიანი ავტომობილი დგას და კომერციულ საქმიანობას ეწევა. ჯერ კიდევ დეკემბრის ბოლოს საკრებულომ მიიღო გადაწყვეტილება, რომლის თანახმად ავტომობილიდან კომერციული საქმიანობა აიკრძალა. ამიტომ ეს გადაწყვეტილება ამასაც უკავშირდება“, — განმარტეს სატრანსპორტო სამსახურში.
თბილისის მერიამ უფრო ადრე მიიღო გადაწყვეტილება, შეამციროს პარკირების ადგილები ტროტუარებზე, რაც ეტაპობრივად განხორციელდება. 2015 წლიდან თბილისში ტროტუარებზე 2,2 ათასი პარკირების ადგილიდან დაახლოებით 900 გააუქმეს.