თბილისი, 2 თებერვალი — Sputnik. აშშ-ის ლიდერის ჯოზეფ ბაიდენის რეიტინგი 2%-ით დაეცა პრეზიდენტობის პირველ დღეებთან შედარებით, იუწყება გამოცემა The Hill.
შესაბამისი გამოკითხვა გამოცემამ 28–29 იანვარს ჩაატარა ჰარისის კვლევის ცენტრთან ერთად ონლაინ–ფორმატში, რა დროსაც 945 დარეგისტრირებული ამომრჩეველი გამოიკითხა.
კვლევის შედეგების თანახმად, ბაიდენის მუშაობას პრეზიდენტის პოსტზე რესპონდენტთა 61% იწონებს. და ეს მაშინ, როცა ინაუგურაციის შემდგომ პირველივე დღეებში, 21–22 იანვარს ჩატარებული გამოკითხვისას ამ მაჩვენებელმა 63% შეადგინა.
გარდა ამისა, გამოკითხვამ აჩვენა, რომ რესპუბლიკელებს შორის ბაიდენის მუშაობით კმაყოფილების დონე 30%-დან 24%-მდე დაეცა, ხოლო დემოკრატებს შორის ეს მაჩვენებელი უცვლელი დარჩა — 94%.
ჯოზეფ ბაიდენი აშშ-ის პრეზიდენტად კონგრესმა მიმდინარე წლის 7 იანვარს დაამტკიცა, ხოლო მისი ინაუგურაცია 20 იანვარს შედგა. შესაბამისად, პოსტზე ის დაახლოებით ორი კვირაა, რაც იმყოფება.
