თბილისი, 27 იანვარი — Sputnik. კომპანია Amazon-ის დამფუძნებელი და მსოფლიოს უმდიდრესი ადამიანი ჯეფ ბეზოსი 1,7 მლნ დოლარს ითხოვს საყვარელი ქალის ძმისგან მაიკლ სანჩესისგან – იმ ხარჯების ასანაზღაურებლად, რაც მან სასამართლოზე დახარჯა მისი პირადი ცხოვრების შესახებ ინფორმაციის გაჟონვასთან დაკავშირებით. აღნიშნულის თაობაზე წერს გამოცემა Bloomberg.
Jeff Bezos, the world's second-richest person, wants $1.7 million from his girlfriend’s brother to cover legal fees he racked up successfully defending a defamation lawsuit https://t.co/BA4A7Ql1x2
— Bloomberg (@business) January 26, 2021
გავრცელებული ინფორმაციით, 2019 წლის იანვარში ცნობილი გახდა, რომ ჯეფ ბეზოსი, 25-წლიანი თანაცხოვრების შემდეგ, ცოლს გაშორდა. ამის მიზეზი მისი ახალი სასიყვარულო ურთიერთობები გახდა.
ირკვევა, რომ ტაბლოიდმა National Enquirer „ჟურნალისტური გამოძიება“ ჩაატარა, „ამაზონის“ მფლობელი ყოფილ ტელეწამყვანთან, 49 წლის ლორენ სანჩესთან სასიყვარულო ურთიერთობაში ამხილა და შესაბამისი ფოტო მანამ გამოაქვეყნა, სანამ მილიარდერი ოფიციალურად გამოაცხადებდა განქორწინების შესახებ.
როგორც თავად ტაბლოიდი ირწმუნება, მისი წარმომადგენლები ბეზოსს დაუკავშირდნენ და მის შესახებ შეკრებილი დოსიეს თაობაზე აცნობეს, რაც მილიარდერის საჯარო განცხადებამდე 48 საათით ადრე მოხდა.
სკანდალის შემდეგ ჯეფ ბეზოსმა კერძო დეტექტივები დაიქირავა, რათა პირადი ცხოვრების შესახებ ინფორმაციის გაჟონვის დეტალები დაედგინა. მოგვიანებით მან განაცხადა, რომ ტაბლოიდის გამომცემი კომპანია American Media Inc, რომელსაც დევიდ პიკერი ხელმძღვანელობს, მას იმ ფოტოების გამოქვეყნებით ემუქრებოდა, რომლებსაც თავად ბეზოსი უგზავნიდა ლორენ სანჩესს.
მოგვიანებით გამოცემა Wall Street Journal წერდა, რომ ტაბლოიდმა ლორენის ძმას მაიკლ სანჩესს 200 ათასი დოლარი გადაუხადა მილიარდერის მიმოწერის მიწოდებისთვის.