თბილისი, 28 მარტი — Sputnik. სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა ორგანიზებული ჯგუფის მიერ განსაკუთრებით დიდი ოდენობით თანხის თაღლითურად დაუფლების ფაქტზე საქართველოს ოთხი მოქალაქე დააკავეს, აღნიშნულია უწყების მიერ გავრცელებულ განცხადებაში.
უწყების ცნობით, ბრალდებულები ერთ-ერთი კომპანიის დირექტორს 2,7 მლნ ლარის გადახდის სანაცვლოდ კომპანიის საბანკო ანგარიშებზე სახელმწიფოს მიერ დადებული ინკასოსა და ყადაღის მოხსნას ჰპირდებოდნენ.
„არწმუნებდნენ, რომ ინფრასტრუქტურის სამინისტროში საკუთარი გავლენისა და ნაცნობობის გამოყენებით უზრუნველყოფდნენ მისთვის რამდენიმე ათეული მილიონი ლარის ღირებულების მსხვილი ინფრასტრუქტურული პროექტის კონკურენციისა და ტენდერში მონაწილეობის გარეშე გადაცემას", – აღნიშნულია უწყების განცხადებაში.
ბრალდებულები თაღლითურად დაეუფლნენ მოთხოვნილი თანხის ნაწილს – 10 ათას აშშ დოლარს, რა დროსაც სუს-ის თანამშრომლებმა ისინი ბრალდებულის სახით დააკავეს.
გარდა ამისა, ორგანიზებული ჯგუფის ერთ-ერთმა წევრმა 2016 წლის საპარლამენტო და 2018 წლის საპრეზიდენტო არჩევნების დროს ზემოხსენებული კომპანიის წარმომადგენელს ვითომდა არჩევნების დასაფინანსებლად და სუს-ის მაღალჩინოსნებისთვის გადასაცემად სამ ეტაპად ჯამში მოტყუებით 350 ათასი ლარი გამოართვა.
გამოძიება ორგანიზებული ჯგუფის მიერ განსაკუთრებით დიდი ოდენობით თანხის თაღლითურად დაუფლების ფაქტზე მიმდინარეობს საქართველოს სსკ-ის 180-ე მუხლის მეორე ნაწილის „ა" და მესამე ნაწილის „ბ" ქვეპუნქტებით, რაც სასჯელის სახით ექვსიდან ცხრა წლამდე ვადით თავისუფლების აღკვეთას ითვალისწინებს.
საქმეზე ინტენსიური საგამოძიებო მოქმედებები მიმდინარეობს.
