თბილისი, 27 მარტი — Sputnik. საქართველოს შინაგან საქმეთა სამინისტროს თანამშრომლებმა მიმდინარე წლის თებერვლიდან ინტერპოლის „წითელი ცირკულარით" ძებნილი აზერბაიჯანის მოქალაქე დააკავეს, ნათქვამია უწყების მიერ გავრცელებულ განცხადებაში.
სამართალდამცველებმა ოპერატიულ-სამძებრო და საგამოძიებო ღონისძიებების შედეგად 56 წლის მამაკაცი თბილისში, სასტუმრო Holiday Inn-ის („ჰოლიდეი ინი") მიმდებარე ტერიტორიაზე დააკავეს.
დაკავებულს ბრალი ედება აზერბაიჯანის რესპუბლიკის სსკ-ის 178-ე მუხლით, რაც გულისხმობს თაღლითობას, რამაც დიდი ოდენობით მატერიალური ზიანი გამოიწვია. დაკავებულს ხუთიდან ათ წლამდე ვადით თავისუფლების აღკვეთა ემუქრება.
ამჟამად დაკავებულის მიმართ კანონით გათვალისწინებული წინასაექსტრადიციო პროცედურები მიმდინარეობს.