თბილისი, 30 აპრილი — Sputnik. საქართველოს მოსახლეობის დიდი ნაწილი დადებითად აფასებს საქართველოს შრომის, ჯანმრთელობისა და სოციალური დაცვის მინისტრის დავით სერგეენკოს საქმიანობას. ამაზე აშშ-ის ეროვნული დემოკრატიული ინსტიტუტის (NDI) გამოკითხვის შედეგები მეტყველებს.
კვლევის შედეგები NDI-ს დირექტორმა ლორა ტორნტონმა ორშაბათს თბილისში წარმოადგინა.
კითხვაზე „დადებითი თუ უარყოფითი დამოკიდებულება გაქვთ შემდეგი პოლიტიკური ფიგურების მიმართ", გამოკითხულთა 46%-მა უპასუხა, რომ დადებითი დამოკიდებულება აქვს დავით სერგეენკოს მიმართ, ხოლო 6%-მა — უარყოფითი.
რეიტინგში შემდეგი პოზიცია პარტია „ევროპული საქართველოს" ერთ-ერთმა ლიდერმა დავით ბაქრაძემ დაიკავა. მის მიმართ დადებითი დამოკიდებულება აქვს 34%-ს, ხოლო უარყოფითი — 18%-ს.
ბაქრაძეს მოსდევს იუსტიციის მინისტრი თეა წულუკიანი. მის საქმიანობას დადებითად აფასებს გამოკითხულთა 31%, ხოლო უარყოფითად — 19%.
თავდაცვის მინისტრის ლევან იზორიას მიმართ დადებითი დამოკიდებულება აქვს გამოკითხულთა 22%-ს, ხოლო უარყოფითი — 10%-ს; შინაგან საქმეთა მინისტრის გიორგი გახარიას მიმართ დადებითი — 21%-ს, ხოლო უარყოფითი — 7%-ს; ოპოზიციონერ გიორგი ვაშაძის მიმართ დადებითი — 21%-ს, უარყოფითი — 7%-ს; საგარეო საქმეთა მინისტრის მიხეილ ჯანელიძის მიმართ დადებითი დამოკიდებულება აქვს 17%-ს, ხოლო უარყოფითი — 9%-ს.
ეკონომიკის მინისტრის დიმიტრი ქუმსიშვილის საქმიანობას დადებითად აფასებს გამოკითხულთა 13%, ხოლო უარყოფითად — 15%.
საპარლამენტო ფრაქციის „ქართული ოცნება — დემოკრატიული საქართველო" თავმჯდომარის მამუკა მდინარაძის მიმართ დადებითი დამოკიდებულება აქვს 12%-ს, უარყოფითი — ამდენივეს. პარლამენტის პირველი ვიცე-სპიკერის თამარ ჩუგოშვილის მიმართ დადებითიცა და უარყოფითი მაჩვენებელიც 11%-ია.
უფრო მეტად ნეგატიური დამოკიდებულება აქვს საქართველოს მოსახლეობას ოპოზიციონერ ნიკა მელიას მიმართ („ერთიანი ნაციონალური მოძრაობა"). უარყოფითად ეკიდება მის საქმიანობას 37%, დადებითად — 18%.
ასევე არ უყვართ თბილისის ყოფილი მერი გიგი უგულავა. მის მიმართ უარყოფითადაა განწყობილი 34%, ხოლო დადებითად — 17%.
ნაკლებად პოპულარულია გამოკითხულთა შორის ფინანსთა მინისტრი მამუკა ბახტაძე — გამოკითხულთა 43%-ს მასზე არაფერი სმენია.
რაც შეეხება თბილისის ახალი მერის კახა კალაძის საქმიანობას, გამოკითხულთა 38% მას კარგად აფასებს, 15% — ძალიან კარგად. 31% — საშუალოდ, 7% — ცუდად და მხოლოდ 5% — ძალიან ცუდად. 4%-მა პასუხისგან თავი შეიკავა და შეარჩია პასუხი „არ ვიცი".
საზოგადოებრივი აზრის ეს კვლევა საქართველოში ჩატარდა 20 მარტიდან 4 აპრილის ჩათვლით პერიოდში პირადი ინტერვიუს სახით. გამოიკითხა 2,2 ათასი რესპონდენტი ქართულ, აზერბაიჯანულ და სომხურ მოსახლეობაში გარდა საქართველოს ცენტრალური ხელისუფლების მიერ არაკონტროლირებადი ტერიტორიებისა — აფხაზეთისა და ცხინვალის რეგიონისა.
NDI ავტორიტეტული არასამთავრობო ორგანიზაციაა, რომელიც საქართველოს მოსახლეობაში საზოგადოებრივი აზრის გამოკითხვას 2010 წლიდან ატარებს. გამოკითხვას NDI-ს დაკვეთით ატარებს ქართული არასამთავრობო ორგანიზაცია „კავკასიის კვლევითი რესურსების ცენტრი" (СRRС) დიდი ბრიტანეთის მთავრობის ფინანსური მხარდაჭერით პროგრამის UK Aid Direct ფარგლებში.
