თბილისი, 1 სექტემბერი — Sputnik. საქართველოს შსს-ს საგანგებო სიტუაციების მართვის სააგენტომ შავი ზღვის სანაპიროზე საკურორტო ზონებში სასტუმროები შეამოწმა. რამდენიმე სასტუმრო უსაფრთხოების წესების დარღვევის გამო დაჯარიმდა, იუწყება საზოგადოებრივი მაუწყებლის პირველი არხი სააგენტოს ინფორმაციაზე დაყრდნობით.
სააგენტოს მონაცემებით, 2017 წლის ივნისიდან დღემდე აჭარაში შეამოწმეს 24 სასტუმრო, ანაკლიაში — სამი, გურიაში — ცხრა სასტუმრო და ერთი სანატორიუმი.
მას შემდეგ, რაც სააგენტოს შენიშვნები არ გაითვალისწინეს, დაჯარიმდა ოთხი სასტუმრო.
"დაჯარიმებული იქნა 4 ობიექტი (სასტუმრო) აჭარის რეგიონში (ორი სასტუმრო 100-100 ლარით, ერთი 200 ლარით, ხოლო მე-4 — 50 ლარით)", — განუცხადა ტელეარხს საგანგებო სიტუაციების მართვის სააგენტოს დირექტორის მოვალეობის შემსრულებელმა კახა ცინცაძემ.
ბოლო წლებში საქართველოში ტურიზმის სფერო დინამიკურად ვითარდება. ზაფხულში ტურისტების დიდი რაოდენობა უპირატესობას ანიჭებს ზღვისპირეთის კურორტებს. დამსვენებლების ერთ-ერთი პოპულარული ადგილია აჭარა.
