თბილისი, 30 აგვისტო – Sputnik. ცენტრალურ საარჩევნო კომისიაში ამ დროისთვის არც ერთ პოლიტიკურ პარტიასა თუ საარჩევნო ბლოკს პარტიული სიები წარდგენილი არ აქვს, განაცხადა ცესკოს პრეს-სპიკერმა ანა მიქელაძემ.
საქართველოში საპარლამენტო არჩევნები 8 ოქტომბერს გაიმართება. კანონმდებლობის თანახმად, ცესკოში პარტიული და მაჟორიტარი დეპუტატობის კანდიდატთა სიების წარდგენის ვადა 8 სექტემბერს იწურება.
მმართველი პარტია „ქართული ოცნება – დემოკრატიული საქართველო“ აცხადებს, რომ პროპორციულ სიებს უახლოეს დღეებში გაასაჯაროებენ, რის შემდეგაც ცესკოში წარადგენენ. მმართველ გუნდში დარწმუნებული არიან, რომ ყველა პროცედურას 8 სექტემბრამდე გაივლიან.
„პროპორციული სიები 8 სექტემბრამდე უნდა გვქონდეს, მაგრამ გამორიცხული არ არის, რომ ჩვენ ამ დრომდე მოვახდინოთ სიის ძირითადი ნაწილის პრეზენტაცია“, — განაცხადა პარტია „ქართული ოცნება — დემოკრატიული საქართველოს“ აღმასრულებელმა მდივანმა ირაკლი კობახიძემ.
ცენტრალურმა საარჩევნო კომისიამ არჩევნებში მონაწილეობის მსურველი 64 პარტიიდან 45 დაარეგისტრირა, 19-ს კი უარი ეთქვა. არჩევნებში მონაწილეობის მისაღებად ცესკოში ამ დროისთვის 7 საარჩევნო ბლოკს აქვს განცხადება შეტანილი. საარჩევნო ბლოკების რეგისტრაციის პროცედურები 1 სექტემბერს დასრულდება.
საქართველოში არჩევნების ე.წ. შერეული სისტემა მოქმედებს. პარლამენტში 77 დეპუტატი პარტიული სიით (პროპორციული სისტემა) მოხვდება, 73 კი იმ კანდიდატებიდან, რომლებიც ერთმანდატიან საარჩევნო ოლქებში (მაჟორიტარული სისტემით) იყრიან კენჭს.