თბილისი, 4 სექტემბერი — Sputnik. გადასახადებისათვის სისტემატურად თავს არიდების გამო, შპს „კაზინო აჭარას“ სახელმწიფო ბიუჯეტის სასარგებლოდ გადასახდელად დაეკისრა 19 269 277 ლარი(8,2 მილიონი დოლარი)
აღნიშნული გადაწყვეტილება მიღებულ იქნა შემოსავლების სამსახურის აუდიტის დეპარტამენტის მიერ ჩატარებული შემოწმების შედეგად, იტყობინება უწყების პრეს-სამსახური პარასკევს, 4 სექტემბერს.
ფინანსთა სამინისტროს საგამოძიებო სამსახურმა, შპს „კაზინო აჭარას“ მმართველი დირექტორის ვედრან ბაიატის, მონიტორინგის სამსახურის უფროსის ვიკტორ ტროიცკის და იურიდიული პირის — შპს „კაზინო აჭარას“ მიმართ დაიწყო სისხლისსამართლებრივი დევნა, სამორინეს სახელითა და მის სასარგებლოდ უკანონო სამეწარმეო საქმიანობისა და მოთამაშეთა კერძო საუბრის უნებართვო მიყურადება-ჩაწერის ფაქტზე.
„გამოძიებით დადგინდა, რომ შპს „კაზინო აჭარა“-ს მმართველი დირექტორი ვედრან ბაიატი, მიუხედავად სამორინეების საქმიანობის მარეგულირებელი კანონმდებლობით დადგენილი აკრძალვისა, არღვევდა ლიცენზირების პირობებს და სისტემატიურად ახდენდა მოთამაშეებზე ფსონების დასადებად სესხების უკანონოდ გაცემას, რითაც შპს „კაზინო აჭარამ“ 7 თვის განმავლობაში მიიღო 12 მილიონ ლარზე მეტი უკანონო შემოსავალი“, — ნათქვამია ინფორმაციაში.
გარდა ამისა, მონიტორინგის სამსახურის უფროსის ვიკტორ ტროიცკის ორგანიზებით, კაზინოს სათამაშო მაგიდებზე დამონტაჟებული მოსასმენი აპარატურის მეშვეობით, სამორინეს სახელითა და მის სასარგებლოდ, უკანონოდ მიმდინარეობდა მოთამაშეთა კერძო საუბრების მიყურადება, ჩაწერა და სერვერებზე შენახვა, აღნიშნულია შეტყობინებაში.
იურიდიულ პირს შპს „კაზინო აჭარას“ ბრალდება წარედგინა სისხლის სამართლის კოდექსის 192-ე მუხლით — უკანონო სამეწარმეო საქმიანობის განხორციელბისათვის და სისხლის სამართლის კოდექსის 158-ე მუხლით — კერძო კომუნიკაციის საიდუმლოების დარღვევისთვის, რაც სასჯელის სახით ითვალისწინებს ჯარიმას, საქმიანობის უფლების ჩამორთმევას ან ლიკვიდაციას.
ბრალდებულებს ვიქტორ ტროიცკის და ვედრან ბაიატს დატოვებული აქვთ საქართველოს ტერიტორია და თავს არიდებენ გამოძიებას.
ვედრან ბაიატისთვის, უკანონო სამეწარმეო საქმიანობისათვის სისხლის სამართლის კოდექსის 192-ე მუხლით წარდგენილი ბრალდება, სანქციის სახით ითვალისწინებს ჯარიმას ან თავისუფლების აღვეთას 1-დან 3 წლამდე, ხოლო ვიქტორ ტროიცკის ბრალდება წარდგენილი აქვს სისხლის სამართლის კოდექსის 158-ე მუხლით — სამსახურებრივი მდგომარეობის გამოყენებით კერძო საუბრის საიდუმლოების დარღვევისთვის, რაც სასჯელის სახით ითვალისწინებს თავისუფლების აღკვეთას 3-დან 7 წლამდე და საქმიანობის უფლების ჩამორთმევას.
გამოძიება აგრძელებს სამორინეს საქმიანობის შესწავლას, მიღებული შემოსავლების კანონიერების, ფულის გათეთრებისა და გადასახადებისაგან თავის არიდების ფაქტების ირგვლივ.
