ოთხშაბათს გავრცელდა ინფორმაცია, რომ ციურიხში ფიფას რამდენიმე მაღალჩინოსანი კორუფციის ბრალდებით დააკავეს. ბრალმდებლები საუბრობენ ფიფაში ბოლო ორი ათწლეულის განმავლობაში არსებულ ფართომასშტაბიან კორუფციაზე მსოფლიო ჩემპიონატებზე განცხადების საკითხში, მარკეტინგულ და სამაუწყებლო გარიგებებში. ბრალდება ასევე ითვალისწინებს თაღლითობას, რეკეტსა და ფულის გამოძალვას.
დე გრეგორიომ განაცხადა, რომ მაღალჩინოსანთა დაკავება ფიფასთვის კარგია.
"არ დამიჯერებთ, მაგრამ ერთხელ კიდევ მინდა ვთქვა: ეს კარგია ფიფასთვის. ეს ცუდია რეპუტაციისთვის, მაგრამ კარგია ყველაფრისთვის, რაც ჩვენ ბოლო 4 წლის განმავლობაში გავაკეთეთ წმენდისა და რეფორმის მიზნით", – განაცხადა ფიფას საზოგადოებასთან ურთიერთობისა და კავშირის დეპარტამენტის დირექტორმა ვალტერ დე გრეგორიომ ციურიხში პრეს–კონფერენციაზე.
მან ასევე უარყო ჭორი რუსეთში 2018 წლის მსოფლიო ჩემპიონატის გაუქმების შესახებ.
"არ შემიძლია სახელების ჩამოთვლა, არ შემიძლია გითხრათ, რამდენი ადამიანი დააკავეს და რამდენის საქმეს იძიებენ. შემიძლია გითხრათ ის, რაც მე ან პრეზიდენტმა ვისაუბრეთ წინა პრეს–კონფერენციაზე: 2018 და 2022 წლის მსოფლიო ჩემპიონატები რუსეთსა და ყატარში ჩატარდება", – აღნიშნა დე გრეოგიომ.
2014 წელს სკანდალი აგორდა 2018 და 2022 წლების მსოფლიო ჩემპიონატების მასპინძელი ქვეყნების, რუსეთისა და ყატარის, არჩევნების გარშემო. მოგვიანებით ფიფამ შიდაგამოძიება ჩაატარა და განაცხადა, რომ არჩევნების პროცესში დარღვევები ვერ იპოვა.
ციურიხში ამ დღეებში მსოფლიო ფეხბურთის უმაღლესმა ხელმძღვანელობამ მოიყარა თავი: 29 მაისს ფიფას კონგრესი უნდა შედგეს, რომლის ფარგლებშიც ორგანიზაციის პრეზიდენტის არჩევნებიც ჩატარდება.